Саха сиригэр аан бастаан спортивнай үҥкүүгэ Арассыыйатааҕы күрэхтэһии ыытыллыаҕа

Балаҕан ыйын 26-28 күннэригэр Саха сиригэр аан бастаан Бүтүн Арассыыйатааҕы үҥкүү спордун күрэхтэһиитэ буолуоҕа, онно 23 эрэгийиэнтэн спортсменнар кэлэн, кыттыахтара. 

Тэрийээччилэр бэлиэтээбиттэринэн, Арассыыйа араас эрэгийиэннэриттэн номнуо 113  паара регистрацияланна.

Судьуйалар истэригэр бу сыл саҥатыгар Бүтүн Арассыыйатааҕы үҥкүү спордун, брейкинг уонна акробатическай рок-н-ролл федерациятын (ФТСАРР) талар эксээмэнин туттарбыт, Саха сирин түөрт бэрэстэбиитэлэ киириэхтэрэ.

Саха сиринээҕи спортивнай үҥкүү сойууһа күрэхтэһии ФТСАРР быраабылаларын тутуһан ыытыллыаҕын бэлиэтээтэ, онно киэргэтиигэ, сырдык уокка, музыкаҕа, спортсменнар тас көрүҥнэригэр, уо.д.а. туспа ирдэбиллэр киирэллэр.

«Хас биирдии ымпыгар-чымпыгар тиийэ болҕомтолоохтук былааннаан, ФТСАРР толорооччу дириэктэрэ Вадим Пермяков салайааччылаах тэрийэр хамыыһыйа дьаныардаахтык үлэлиир. Бу күрэхтэһии Саха сиригэр үҥкүү спорда сайдарыгар төһүү буолуоҕа.  Бу күрэхтэһиилэр төрөппүттэргэ да, оҕолорго да интэриэһинэй буолуохтара, кинилэр бу кэрэхсэбиллээх көрүҥҥэ кыттар кыахтаныахтара. Барыларын кэтэһэбит», — диэн бэлиэтээтэ СӨ Үҥкүү спордун сойууһун толорооччу дириэктэрэ Лена Иванова.

Күрэхтэһии «Триумф» спортивнай бэлэмнэнии киинигэр ыытыллыаҕа. Араас саастаах дьоҥҥо аналлаах күрэхтэһиилэр сарсыарда 9 чаастан киэһэ 9 чааска диэри ыытыллыахтара. Сиһилии араспысаанньа балаҕан ыйын 18 күнүн кэнниттэн https://sakhadancesport.ru/ аадырыска баар буолуоҕа.

Сиһилии: https://www.sakha.gov.ru/news/12008