Саха сиригэр ааспыт сууккаҕа 23 ойуур баһаара умуруоруллубут

Ааспыт сууккаҕа Саха сиригэр 3 120 га иэннээх 7 ойуур баһаарын уонна 887 га иэннээх 16 ландшафтнай баһаары умуруордулар. Бу туһунан брифиҥҥэ  Экология министиэристибэтин солбуйааччыта Андрей Коноплев иһитиннэрдэ.

Ол кэмҥэ 300 га иэннээх 2 саҥа ойуур баһаара 48 га иэннээх 5 ландшафтнай баһаар Дьааҥыга, Өймөкөөҥҥө, Эбээн-Бытантайга булуллубут. Ыам ыйын 13 күнүгэр 8 ойуур баһаара турбута биллэр:  6 — Дьааҥыга, 2 -Эбээн Бытантайга.

«ЫБМ эрэсиимэ Дьааҥыга салҕанар. Улууска сааскы бултааһын хааччахтанна.  Баһаартан сэрэхтээх буолуу сезона саҕаланыаҕыттан ойуур баһаарыгар 11 буруйдаах тутуллубут», — диэн Коноплев бэлиэтээтэ.

Баһаартан сэрэхтээх буолуу сезона саҕаланыаҕыттан Саха сирин территориятыгар 75 ойуур баһаара регистрацияламмыт. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.