Саха сиригэр адьырҕа кыыллар ахсааннарын сүрүннээһин туһунан Ил Түмэҥҥэ бырабыыталыстыба чааһа ыытыллыаҕа

Чуолаан, бөрөлөр уонна эһэлэр ахсааннарын сүрүннээһин туһунан этиллэр.

Саха сирин парламеныгар олунньу 20 күнүгэр өрөспүүбүлүкэ сиригэр-уотугар ардай аһыылаахтар ахсааннарын сүрүннээһин туһунан бырабыыталыстыба чааһыгар кэпсэтиэхтэрэ.

Сүрүн дакылааты Саха сирин экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Николай Додохов оҥоруоҕа.

Ил Түмэн Сиргэ сыһыаннаһыыга, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин тустаах боппуруос өрөспүүбүлүкэбит олохтооторун этэҥҥэ буолууларыгар суолталаах диэн бэлиэтээтэ.

“Онон бөрө уонна тыатааҕы курдук адьырҕа кыыллар ахсааннарын сүрүннээһин наадатын туһунан этиллэр. Кэнники сылларга биһиги бу кыыллар сүөһүгэ уонна дьоҥҥо саба түһэр түгэннэрэ элбээбитин бэлиэтиибит. Бу тыа сирин оройуоннарын олохтоохторугар кутталы үөскэтэр уонна тыа хаһаайыстыбатыгар хоромньуну таһаарар. Бөрөлөр уонна эһэлэр сүөһүнү-сылгыны тардаллар, онон пиэрмэрдэргэ ночооту таһаараллар. Бу, биллэн турар, эрэгийиэҥҥэ ас-үөл куттала суох буолуутугар бэрдэ суох сабыдыаллаах.”