Саха сиригэр аһылыгы тэрийиигэ биир кэлим стандарты киллэрэн, олохтоох ас-үөл атыытын улаатыннарар сорук турар

Ас-үөл хаачыстыбатыгар уонна куттала суох буолуутугар Ил Дархан иһинэн координационнай сэбиэт мунньаҕар оскуолалары, уһуйааннары, социальнай тэрилтэлэри аһынан хааччыйыыга  тыа хаһаайыстыбатын уонна булт-балык, олохтоох бородууксуйа аһын туһанар туһунан дьүүллэстилэр.

Үөрэх уонна билим миниистирин бастакы солбуйааччы Ньургун Павлов бэлиэтээбитинэн, өрөспүүбүлүкэҕэ оскуола иннинээҕи уонна уопсай үөрэхтээһин үөрэнээччилэригэр сылаас аһылыгы тэрийиигэ биир кэлим стандарт олоххо киирэн эрэр. Бу стандарт быһыытынан, уһуйааннарга уонна оскуолаларга муниципальнай атыылаһыыга олохтоох аһылык ылар өлүүтэ 2026 сылга 38,9%, 2027 сылга 45,9%, 2028 сылга 53% уонна 2029 сылга 60%, оттон судаарыстыба  атыылаһыытыгар 2026 сылга 22,5%, 2027 сылга — 30%, 2028 сылга 37,5%, 2029 сылга 45% буолуохтаах. Хас биирдии улуус уонна куорат уокуруга оскуола аһылыгын хаачыстыбатыгар муниципальнай стандарты оҥоруохтаах.

Аһылык технологиятын өрөспүүбүлүкэтээҕи киинин салайааччыта Айаал Тимофеев Ленскэй оройуонугар оскуолаҕа аһылыгы тэрийии үтүө уопутун бэлиэтээтэ. Ол курдук 2023 сыл балаҕан ыйыгар олохтоох үүт собуотун базатыгар оскуола аһылыгын тэрийэр муниципальнай кэмбинээт аһыллан, оройуон оскуолаларын барытын биир менюнан хааччыйар. Меню  75%-на олохтоох бородууксуйаттан турар, онно эттэн, балыктан оҥоһуллубут полуфабрикаттар, оҕуруот аһа уонна үүт астар киирэллэр. Ыйытыы түмүгүнэн, оскуола оҕотун 70%-тан тахсата маннык аһы астынара  көстүбүт.

Үлэ уонна социальнай сайдыы миниистирин солбуйааччы Иннокентий Коротких этэринэн, социальнай тэрилтэлэр атыылаһар уопсай табаардарыттан 22%-нын олохтоох оҥорон таһаарааччылартан ылаллар. Олохтоох оҥорон таһаарааччылары өйүүр туһугар, аһы-үөлү атыылаһыыга биэдэмистибэлэр биир улахан сакааһы оҥорбокко, хас биирдии лотунан тус-туспа  атыылаһалларыгар министиэристибэ сүбэлиир.

Ил Дархан Стратегическай Ыйааҕынан олохтоох оҥорон таһаарыыны уонна туризмы сайыннарыыга 2030 сылга диэри муниципальнай атыылаһыыга олохтоох ас-үөл бородууксуйатын өлүүтүн 60% тиэрдэр сорук туруоруллар, диэн иһитиннэрэр Ил Дархан, бырабыыталыстыба пресс-сулууспата.