Саха сиригэр “Алдан” эрэгийиэннэр кыттыгас бастакы киинэлэрэ сүрэхтэннэ

“Цифровой алмас” пуорум кэмигэр Саха сирин уонна Запорожье уобалаһын холбоһуктаах бырайыактарынан “Алдан” киинэ биһирэмэ буолла. Аатырбыт “Рядовой Чээрин” киинэ ааптара Дмитрий Кольцов режиссердаабыт. Сюжетын бу бырайыак генеральнай дириэктэрэ Данил Куликов биллэр актер, сценарист, режиссер Иван Охлобыстины кытта толкуйдаабыттар.

Киинэ өрөспүүбүлүкэ Ил Дархана Айсен Николаев көҕүлээһининэн оҥоһулунна, ону тэҥэ Арассыыйа Бэрэсидьиэнэ Владимир Путин өйөөбүтэ.

“Алдан” – анал байыаннай дьайыы туһунан эрэгийиэннэр икки ардыларынааҕы бастакы уус-уран бырайыак. Сүрүн дьоруойу актер Илья Яковлев оонньоото. Киинэҕэ Саха сирин артыыстарын сэргэ Арассыыйа артыыстара, ол иһигэр  Иван Охлобыстин уонна  Дмитрий Дюжев уһулуннулар. Ону тэҥэ бэлиитик уонна уопсастыбаннай диэйэтэл Джефф Монсон кытынна.

Киинэ Саха сириттэн баҕа өттүнэн кыттыбыт Спиридон Дьяконов туһунан кэпсэнэр. Хартыынаҕа дьиҥнээх түгэннэр үгүстэр. Сүрүн дьоруой прототибынан Саха сириттэн байыаннай быраас Николай Потапов буолар, кини Эр санаа уордьанынан наҕараадаламмыта. Бу наҕараадатын Донецкай Норуодунай Өрөспүүбүлүкэҕэ Павловканы штурмалааһыҥҥа көрдөрбүт хорсун быһыытын иһин ылбыта.

“Мин Николайы кытта билсибитим ыраатта, кини быраас эрэ буолбакка, ИТ-бырайыактары төрүттээччи, “Якутия” технопарка резиденэ. Билигин “ЭкспоСкиллс” диэн 700 оҕо үөрэнэр ИТ-оскуолатын  уонна ДНӨ Кировскай куоратыгар ИТ-киини салайар.   Быйыл Николай Cryolite Games видео-оонньуулары оҥорор студияны төрүттээтэ. Киинэттэн олус долгуйдум. Бу саамай киэҥ хабааннаах Саха киинэтэ.  Киинэ улахан чааһын өрөспүүбүлүкэбитигэр уһулбуттара, креативнай кластер кыаҕа туһаныллыбыта: XR виртуальнай кинопродакшен студиялара, хромакей студиялара уо.д.а, — диэтэ Саха сирин Бырабыыталыстыбатын Бэрэссэдээтэлин солбуйааччы Анатолий Семенов.

Хартыына релиһэ улахан экраҥҥа уонна интэриниэт-платформаларга 2025 сыл олунньу ыйга тахсыаҕа.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата