Саха сиригэр аномальнай тымныы буолара күүтүллэр

Саха сирин киин улуустарыгар, хоту Уралга уонна Сибииргэ, Забайкальскай кыраайга, Бурятияҕа уонна Иркутскай уобаласка -20-40 С кыраадыс диэри аномальнай тымныы түһэрин туһунан Арассыыйатааҕы Гидрометеосулууспа научнай салайааччыта Роман Вильфанд иһитиннэрдэ.

«Температура нуорматтан сэттэ уонна онтон ордук кыраадыс намыһах буоллаҕына кутталлаах. Сорох эрэгийиэннэргэ куттал суоһуур», — диир Роман Вильфанд. Бу туһунан РИА новости суруйар.

Кини этэринэн, кулун тутар 28-29 күннэригэр Саха сирин киин улуустарыгар -36-40 С кыраадыска диэри тымныйыаҕа. Ненецкэй аптаныамыйалаах уокурукка уонна Коми Өрөспүүбүлүкэтигэр салгын температурата нуорматтан 7-10 кыраадыс түһүөҕэ. Ямало-Ненецкэй аптаныамыйалаах уокурукка температура нуорматтан 6-9 кыраадыс түһэн, -32С кыраадыска диэри тымныйар. Ханты-Мансийскай уокурукка уонна Красноярскай кыраайга -35С кыраадыска диэри тымныы түһэрэ күүтүллэр, оттон Бурятияҕа уонна Забайкалье кыраайыгар -25С кыраадыс буолуоҕа.