Саха сиригэр Арассыыйа муниципальнай тэриллиилэрин салайааччылара муһуннулар

Дьокуускайга “Мээрдэр оскуолалара” муниципальнай салайар каадыр эрэсиэрбэтин сайыннарар бырагыраама олоҕурбут көрүҥүнэн муодула буола турар. Үһүс бөлөххө үөрэнээччилэри – дойду эрэгийиэннэрин куораттарын уонна муниципальнай тэриллиилэрин салайааччыларын кытта олунньу 5 күнүгэр Ил Дархан Айсен Николаев көрүстэ.   

Үһүс бөлөххө (поток) барыта 80 киһи үөрэнэр, олортон 74 киһи Саха сиригэр кэллэ. Кыттааччылар кэккэлэригэр Саха сириттэн Мэҥэ Хаҥалас улууһун баһылыга Дмитрий Тихонов уонна Хаҥалас улууһун 1-кы Малдьаҕар нэһилиэгин баһылыга Айталина Васильева бааллар.

Айсен Николаев кыттааччыларга дойду саамай улахан эрэгийиэнин уратытын туһунан кэпсээн туран, Саха сирин социальнай-экэнэмиичэскэй сайдыытын билиһиннэрдэ.

“Саха сирэ киһи хапытаалын үрдүк ураты таһымнаах эрэгийиэнэ эрэ буолбатах, Уһук Илин экэнэмиичэскэй лиидэрэ. Биһиги эрэгийиэннээҕи валовай бородууктанан бастакы миэстэҕэ турабыт. Өрөспүүбүлүкэ алмааһы хостооһуҥҥа аан дойдуга лидер, быйыл таас чоҕу, көмүһү хостооһуҥҥа аан бастакытын иккис миэстэҕэ таҕыстыбыт. 2018 сылтан 2024 сылга диэри 390 саҥа социальнай эбийиэги туттубут:  74 оскуоланы, 81 уһуйааны, 104 доруобуйа харыстабылын эбийиэгин, 67 – култуура, 49 – успуорт, 8 – социальнай хааччыйыы», – диэн Айсен Николаев эттэ.

Истээччилэр Ил Дархаҥҥа сэҥээрэр ыйытыыларын биэрдилэр. Ордук кинематография туһунан сэргээтилэр. Саха киинэлэрин дойду киинэ тыйаатырдарыгар маассабайдык көрдөрөр ирдэнэрин бэлиэтээтилэр.

Димитровград куорат куораттааҕы Дууматын бэрэссэдээтэлэ Ксения Душкова Ил Дарханы Ульяновскай уобаласка ураты медкластеры кытта  билсэ кэлэригэр ыҥырда. Онтон Пермь дьаһалтатын баһылыгын солбуйааччы Екатерина Мальцева Саха сирин аниматордарын Пермскай кыраайга ыытыллар бэстибээлгэ кытталларыгар ыҥырда.

Түмүккэ Айсен Николаев муниципальнай былаас инники күөҥҥэ үлэлиир дьоҥҥо ордук чугас былаас буоларын бэлиэтээтэ. “Мээрдэр оскуолаларын” үһүс бөлөҕүн кыттааччыларыгар бэйэлэрин эрэгийиэннэрин уонна дойдуларын олохтоохторун туһугар салгыы үлэлэригэр ситиһиини баҕарда.

“Мээрдэр оскуолалара” бырайыак Арассыыйа Бэрэсидьиэнэ Владимир Путин сорудаҕынан ыытыллар итиэннэ РФ Бэрэсидьиэнин дьаһалтатынан уонна Бүтүн Арассыыйатааҕы олохтоох бэйэни салайыныыны сайыннарар ассоциация өйөбүлүнэн Бэрэсидьиэн академиятын судаарыстыбаннай салайыыга үрдүкү оскуолата үлэлэтэр.

Ил Дархан уонна Бырабыыталыстыба пресс-сулууспата.