Саха сиригэр Авиация 100 сыллаах үбүлүөйүн бэлиэтээтилэр

Алтынньы 11 күнүгэр Саха сирин авиациятын тэрилтэлэрин үлэһиттэрэ уонна бэтэрээннэрэ Авиация салаатын 100 сыллаах үбүлүөйүн бэлиэтээтилэр.

«Саха сирин авиацията бэйэтин бэлиэ күнү дьоһун ситиһиилэрдээх көрсөр. Бу – аэропортары киэҥ далааһыннаахтык саҥардан оҥоруу уонна хапытаалынайдык өрөмүөннээһин: өрөспүүбүлүкэ 11 аэропордугар саҥардан оҥоруу үлэтэ ыытылынна, 5-кэ үлэ былааннанар, 15-кэ хапытаалынай өрөмүөн ыытыллыаҕа. Салгын аалларын паарката саҥардыллар: быйыл үс Ми-8 бөртөлүөт атыылаһылынна.

Биһиги Санкт-Петербурдааҕы гражданскай авиация институтун Дьокуускайдааҕы филиалын саҥа үөрэх куорпуһун тутуутун саҕалыырга бэлэммит. Дьокуускай аэропордун норуоттар икки ардыларынааҕы терминалын саҥардан оҥорууга докумуоннара бэлэмнэнэллэр», – диэн кэпсээтэ СӨ Тырааныспарга уонна суол хаһаайыстыбатыгар миниистирэ Владимир Сивцев.

Саха сиригэр авиация устуоруйата 1925 сыл алтынньы 8 күнүттэн саҕаланар. Өрөспүүбүлүкэ үрдүнэн бастакынан көппүт сөмөлүөтүнэн аатырбыт лүөччүк Петр Фадеев штурвалыгар олорбут биир мотуордаах «Сопвич» биплан буолбута. Кини Даркылаах  аттыгар сиртэн көтөн тахсан, хас да мүнүүтэ көппүтүн кэннэ бипланы Күөх хонууга олордубута. Алтынньы 12 күнүгэр «Сопвич» Дьокуускай–Покровскай–Дьокуускай маршрутунан биир пассажирдаах бастакы толору рейсин оҥорбута.

Үс сыл буолан баран Иркутскай – Дьокуускай салгын линията официальнайдык аһыллыбыта. Пассажирдары Ю-13 «Моссовет» гидро-сөмөлүөтүнэн таһаллара, оттон көтөргө уонна түһэргэ Өлүөнэ өрүс уонна кини салааларын уутун ньуурун туһаналлара. Хас да сыл иһигэр аэродром баар буолбута, Дьокуускай уонна атын улуустар икки ардыларыгар сылдьар рейстэр аһыллыбыттара.