Саха сиригэр “Азия оҕолоро” VIII спортивнай оонньуулар волонтердарын үөрэтии саҕаланна

“Азия оҕолоро” VIII спортивнай оонньуулар волонтердара үс түһүмэхтээх — теоретическай, функциональнай уонна практическай үөрэхтэрин  саҕалаатылар. Ол туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Санатан эттэххэ, Дьокуускайга оонньуулары тэрийиигэ, ыытыыга 1900 волонтер көмөлөһүөҕэ.

Саха сирин баһылыга Айсен Николаев эппитинэн, “Азия оҕолоро” оонньуулар бары волонтердарга бэртээхэй уопуту биэриэҕэ уонна атын дойдулартан, араас эрэгийиэннэртэн кэлбит саастыы оҕолорун кытта билсэллэригэр төрүөт буолуоҕа.

Волонтердары үөрэтии бэс ыйын 26 күнүгэр диэри түмүктэниэ. Практикаларын “Азия оҕолоро” оонньуулар ыытыллар сирдэригэр барыахтара. Бэс ыйын 5 күнүттэн “Тим-лиидэрдэр” уонна “Аккредитация” хайысхаларынан үлэлэрэ саҕаланыа.

“Азия оҕолоро” VIII норуоттар икки ардыларынааҕы спортивнай оонньуулар Дьокуускайга бэс ыйын 25 күнүттэн от ыйын 7 күнүгэр диэри ыытыллыахтара. 3,5 тыһыынча ыалдьыт, ол иһигэр 2,6 тыһыынча спортсмен кэлэрэ күүтүллэр.

Арассыыйа Бэрэсидьиэнэ Владимир Путин “Азия оҕолоро” оонньуулары “оҕо-улаатан эрэр оҕо спордун эйгэтигэр биир саамай интэриэһинэй уонна ситиһиилээхтик ыытыллар бырайыагынан ааттаабыта”.