Саха сиригэр байыаннай дьайыы бэтэрээнэ тэрилтэҕэ кылаабынай мэхээнньигинэн үлэлиир

Семен Павлов хантараагынан байыаннай дьайыыга сулууспалыан иннинэ суолу тутууга кылаабынай мэхээнньигинэн үлэлээбитэ. Дьиэтигэр эргиллэн кэлэн баран, бэтэрээн урукку дуоһунаһыгар төттөрү киирбитэ.

“Семен Павлов оройуон уопсастыбаннай олоҕор көхтөөхтүк кыттар. Эр санааланыы уруогун ыытар, ыччаты патриот буоларга иитэр”, — диэн “Аҕа дойдуну көмүскээччилэр” госпуонда филиалын социальнай сүрүннээччитэ Сергей Атласов кэпсээтэ.

Байыас Купянскай хайысхаҕа Луганскайга сулууспалаабыта. Хорсунун иһин “Эр санаатын иһин” уонна “Бойобуой өҥөлөрүн иһин” мэтээллэринэн наҕараадаламмыта.

Санатан эттэххэ, Саха сирин баһылыга Айсен Николаев Судаарыстыбаннай Мунньахха (Ил Түмэҥҥэ) туһаайан этиитигэр байыаннай дьайыы кыттыылаахтарын эйэлээх олоххо социальнай адаптацияларын сүрүн соруктартан биирдэстэринэн ааттаабыта.

“Биһиги байыастарбыт төрөөбүт дойдуларыгар кыайыы көтөллөөх эргиллиэхтэрэ уонна биһиги – былаас уонна уопсастыба иннигэр дьоһун сорук турар. Биһиги кинилэр эйэлээх олоххо этэҥҥэ киириилэригэр бэлэмниэхтээхпит. Хас биирдии буойуну толору чөлүгэр түһэриэхтээхпит. Үлэҕэ киллэриэхтээхпит, үгүөрү хамнаһынан хааччыйыахтаахпыт. Өрөспүүбүлүкэ бырабыыталыстыбатыгар , муниципальнай тэриллиилэр баһылыктарыгар бары хайысхаларынан байыаннай сулууспалаахтар социальнай өттүнэн адаптацияларыгар үлэни күүһүрдэргэ соруйабын”, — диэбитэ өрөспүүбүлүкэ баһылыга.

Өрөспүүбүлүкэ баһылыгын сорудаҕынан “Дьоруойдар кэмнэрэ” федеральнай бырагыраамаҕа майгынныыр “Саха сирэ – дьоруойдар сирдэрэ” каадыр бырагыраамата саҕаланар

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата