Саха сиригэр байыаннай дьайыы кыттыылаахтарын кэргэттэрэ массыынаны ыыта үөрэнэллэригэр үөрэхтэрин сыаната төлөнөр буолла

Байыастар өлбүт эбэтэр бааһыран баран инбэлиит буолбут буоллахтарына, кинилэр кэргэттэрэ массыына ыытар быраабы ылалларыгар үөрэхтэрэ төлөнүө. Бу туһунан алтынньы 21 күнүгэр брифиҥҥэ СӨ Бырабыыталыстыбатын бэрэссэдээтэлин солбуйааччы Георгий Степанов иһитиннэрдэ.

Ил Дархан ыйааҕынан байыаннай дьайыы кыттыылаахтарын дьиэ кэргэттэрин өйүүр саҥа миэрэ баар буолла. Бу нуорма 2025 сыл тохсунньу 1 күнүттэн үлэҕэ киириэ.

“Байыаннай дьайыы кыттыылаахтара өлбүт эбэтэр бааһыран баран инбэлиит буолбут, эмсэҕэлээбит буоллахтарына, кинилэр кэргэттэрэ массыынаны ыыта үөрэнэллэригэр үөрэхтэрин сыанатын толуйар өссө биир көмө олохтонно. Массыынаны ыытар дастабырыанньатын ылбыт буоллаҕына, үөрэҕин ороскуота төлөнүө”, — диэтэ Георгий Степанов. Бу туһунан Ил Дархан, Бырабыыталыстыба пресс-сулууспата иһитиннэрэр.