Саха сиригэр байыаннай сулууспаҕа мобильнай пуун үлэлиир

Саха сиригэр хантараагынан сулууспаҕа мобильнай пуун чугас сытар оройуоннарга үлэтин саҕалаата. Бу туһунан бүгүн, ыам ыйын 23  күнүгэр,  хантараагынан байыаннай сулууспаҕа Дьокуускайдааҕы сүүмэрдиир пуун инструктора, старшай прапорщик Алексей Колесов иһитиннэрдэ.

Кини иһитиннэрэр-билиһиннэрэр үлэлэр Хаҥалас, Нам, Горнай оройуоннарыгар ыытыллыбытын туһунан сырдатта. Ону сэргэ өрүс суола аһылынна даҕаны, мобильнай пуун үлэтин өрүс уҥуордааҕы улуустарга ыытарын туһунан кэпсээтэ.

Бэлиэтээн суруйдахха, мобильнай пуун инструктордара нэһилиэнньэҕэ информацияны миэстэтигэр тиэрдэллэр. Ол курдук байыаннай сулууспаҕа киирии ирдэбиллэрин, социальнай чэпчэтиилэр тустарынан бары ыйытыылары 32-10-40 нүөмэргэ эрийэн билсиэххэ сөп. Эбэтэр сайаапканы службапоконтракту14.рф сайтка хаалларыахха сөп.