Саха сиригэр байыаннай сулууспалаахтары эбии хааччыйыы кэрискэтин кэҥэттилэр

Өрөспүүбүлүкэҕэ быстах хомуурга ыҥырыллыбыттарга уонна баҕа өттүлэринэн барбыттарга туттар тэриллэринэн эбии хааччыйыы кэрискэтин хаҥаттылар. Бу туһунан бүгүн брифиҥҥэ СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт салайааччыта Дмитрий Лепчиков иһитиннэрдэ.

“Байыаннай хамыһаар сайаапкатынан өрөспүүбүлүкэ саппааһыттан материальнай ресурсалары көрүүнү хааччыйыахпыт. Бу ууну ыраастыыр фильтрдэр, эрбии, улаханнык саҥарарга аналлаах тэрил, балааккалар, генератордар”, — диэтэ Лепчиков.

Ону тэҥэ анал байыаннай эпэрээссийэҕэ кыттааччыларга өрөспүүбүлүкэҕэ туспа “суһал линияны” тэрийдилэр, онон байыаннай сулууспалаахтар анал  эпэрээссийэ ыытыллар сиригэр боппуруостарын суһаллык  быһааттарарга суукканы эргиччи эрийиэхтэрин сөп.

Лепчиков этэринэн, “суһал линия” төлөпүөнүн нүөмэрдэрэ анал байыаннай эпэрээссийэ кыттыылахтарыгар, байыастарыгар эрэ аналлаахтар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Хаартыска: тустаах саайтан