Саха сиригэр байыаннайдар саанан ытарга бэлэмнэнэллэригэр аналлаах киин тутуллуоҕа

Бу туһунан Саха сирин Ил Дархана Айсен Николаев байыаннай дьайыы бэтэрээннэрин уонна интернационалист-буойуттары кытта көрсүһүүгэ иһитиннэрдэ.

“Дойду дьаһалтатын кытта кэпсэтии түмүгүнэн, өрөспүүбүлүкэбитигэр кыраҕытык ытар дьоҕуру сайыннарар соруктаах анал сир тэриллиэҕэ. Тутуу бу сыл сааһыттан саҕаланыаҕа”, — диэн кэпсээтэ Айсен Николаев. Көрсүһүүгэ өрөспүүбүлүкэҕэ ыччаты байыаннай-патриотическай иитиигэ үлэни күүһүрдэр, байыаннай дьайыы кыттыылаахтарыгар социальнай өйөбүллэр тустарынан кэпсэттилэр.

Ил Дархан байыаннай дьайыы бэтэрээннэрин көхтөөх гражданскай санааларын, уопсастыбыннай үлэттэн туора турбакка кытталларын иһин махтанна.

Афганистан бэтэрээннэрин сойууһун бэрэссэдээтэлэ Валерий Лютай олунньу 22 күнүгэр ыытыллар Бүтүн Арассыыйатааҕы байыаннай эпэрээссийэ кыттыылаахтарыгар анаммыт телемарафоҥҥа өрөспүүбүлүкэ кыттыыны ыларын туһунан этиитин өйөөтө.

«Ветераны боевых действий Якутии «За Отечество!» ассоциация бэрэссэдээтэлэ Иван Черкашин Ил Дархаҥҥа байыаннай эпэрээссийэ зонатыгар командировкатын туһунан дакылааттаата. Ону таһынан «Боотур» кииҥҥэ байыаннай инструктордары уонна доброволецтары бэлэмнээһин үлэтин кытта билиһиннэрдэ.