Саха сиригэр баклан туох кутталы үөскэтэрий?

«Баклан көтөрдөр  балыктаах күөллэрбит экосистематын алдьатыахтарын сөп», — диэн учуонайдар сэрэтэллэр.

Бу көтөрдөр тыһыынчанан эбэтэр икки тыһыынчанан холуонньалаан уйаланар уратылаахтар. Улахан көтөрдөр убаҕастара күөллэри, өрүстэри киртитэр уонна сытытар эбит. Маннык усулуобуйаҕа кус аһылыга суох хаалар куталлаах диэн учуонайдар быһаараллар.

Саха сиригэр билигин Байкалга курдук улахан баклан көтөр үөрүн ахсаана суох. Саха сирин учуонайдара өрөспүүбүлүкэҕэ бу көтөр буортуну, атын көтөрдөрү, балыгы суох оҥорор кутталлааҕын туһунан өссө дакаастыахха наада диэн этэллэр.

Санаттахха, баклан көтөр бастакы уйалара 2018 сыллаахха Сунтаар оройуонугар Хоро бөһүөлэгиттэн чугас булуллубуттара. Олохтоох нэһилиэнньэ тутатына кинилэри суох оҥорбуттара. Ол кэннэ Алдан оройуонугар Томмот таһыгар эмиэ бааллара бэлиэтэммитэ. Онтон көтөр Ленскэй оройуонугар Витим өрүс уһугар уйаламмыта биллибитэ. Быйыл бу көтөрдөрү булчуттар Ньурбаҕа, Үөһээ Бүлүүгэ,  Өлүөхүмэҕэ  бэлиэтээбиттэрэ.

Холобур, Саха сиригэр биир көтөр кэлбит буоллаҕына, баклан олус түргэнник ууһуур уонна ахсаана элбиир кутталлаах. Ол түмүгэр ахсаана икки-үс төгүл улаатыан сөп. Аны туран бу көтөр этэ сиэниллибэт эбит- этигэр араас паразиттар баар буолуохтарын сөп.

Ыам ыйыттан Бурятияҕа бакланнары суох оҥорууга күүстээх дьаһал ылылынна. Бурятия булчуттара бакланнары ытан өлөрүүгэ бастакы көҥүллэрин ыллылар уонна кубуотанан бүдьүөккэ үп-харчы ылыахтара. Көтөрдөр ахсаанын бэрээдэктээһин туһунан быһаарыыны Бурятия Өрөспүүбүлүкэтин парламена ылыммыт. Маннык күүстээх миэрэлэри ылынарга булчуттар дьокутааттарга этиилээх тахсан туруорсубуттар. Экология чахчыларынан, ортотунан  бакланнар сыл ахсын 800 туонна уомулу уонна да атын балыктар көрүҥнэрин суох оҥороллор.