Саха сиригэр бастакы хаһыҥнар бэлиэтэннилэр

Атырдьах ыйа саҕаланыаҕыттан бастакы хаһыҥнар түстүлэр. Холобур, атырдьах ыйын 2 күнүн түүнүгэр Уус Алдан улууһугар бастакы тоҥоруу бэлиэтэннэ, бу туһунан «Мүрү саһарҕата» ТХ-ханаала суруйар.

Бу иннинэ Саха сирин синоптиктара түүн кэккэ улуустарынан  -3С кыраадыска диэри тымныйарын, хаһыҥнар түһэллэрин туһунан сэрэппиттэрэ. Сэрэтиллибитин курдук, түүнүн тоҥоруу түһэн, аһаҕас халлаан анныгар нэлэйэ сыппыт сорох оҕуруот аһа үлүйэ охсубут.

«Түүн күүтүллүбүтүн курдук хаһыҥ түһэн кыаҕын биллэрдэ. Дүпсүҥҥэ, Майаҕаска, Чараҥҥа, Бороҕон илин өттүгэр, Өнөргө, о.д.а. сиргэ хортуоппуй, кабачок, помидор уктара ньалбайбыттар. Мантан иннэ кутталланна быһыылаах. Онон кыһыҥҥы хаһааспытыттан маппат туһуттан оҕуруоппутун киэһэ аайы бүөбэйдиир буоллахпыт», — диэн ТГ-ханаалга суруйаллар. Итини кытта Ньурба улууһун Бөгдьөөлөҕөр  «бөлүүн +2С кыраадыс буолбутугар помидор, биэрэс үлүйбүт» диэн «Ньурба хаһыата» ТГ-ханаалга иһитиннэрдэ.