Саха сиригэр бастакы кыһыҥҥы өрүс суола аһылынна

Саха сиригэр Муома оройуонугар Индигиир өрүһү туоруур бастакы кыһыҥҥы суол аһылынна. Хонууттан Буор Сыһыыга диэри туоруур хайысханан өрүс суолун аспыттарын туһунан СӨ ЫБММ пресс-сулууспата иһитиннэрэр.

Бу суолунан үс туоннаҕа диэри ыйааһыннаах тырааныспардар айанныыллара көҥүллэнэр.

«Билигин өрөспүүбүлүкэ территориятыгар 47 өрүс суола учуокка турар. ГИМС инспектордара массыына өрүскэ тахсыбатын туһуттан рейдэлэри оҥороллор. Холобура, Мэҥэ Хаҥалас оройуонугар бүгүн сэттэ боротокуол толорулунна», — диэн СӨ ЫБММ уу эбийиэктэригэр дьон олоҕор куттал суоһаабатын хааччыйар отдел начаалынньыга Майя Алексеева иһитиннэрэр.