Саха сиригэр «Бастакылар хамсааһыннара» салайааччыта Артур Орлов кэллэ

Саха сиригэр «Бастакылар хамсааһыннара» бырабылыанньатын бэрэссэдээтэлэ, Арассыыйа Дьоруойа Артур Орлов кэллэ. Кини Ил Дархан Айсен Николаевы кытта кэпсэттэ уонна ыччаты кытта «Патриот» кииҥҥэ көрүстэ диэн ЯСИА суруйар.

«Саха сирэ олус истиҥник, сылаастык көрүстэ. Ил Дархан Айсен Николаевы кытта көрсөн, 2025 сыл түмүктэрин таһаардыбыт уонна 2026 сылга былааннарбытын ырыттыбыт. Ил Дархан уонна кини хамаандатын, хамсааһын эрэгийиэннээҕи салааатын өйөбүллэрин билэбит. Итиэннэ кыттааччылар олус көхтөөхтөр, федеральнай бырайыактарга өрүү бааллар», — диэн Артур Орлов этэр.

Арассыыйа Дьоруойа былырыын киин куоракка аһыллыбыт «Патриот» ыччат киинигэр сырытта, ыччаты кытта ирэ-хоро кэпсэттэ, ыытыллар үлэлэри сыаналаата.

«Ыччаты түмэр сирдэргэ кэллэххэ, киһи туох иһин үлэлиирин түмүктэрин оҥостор эбит. Эдэр дьону кытта кэпсэтэн сэниэлэнним, санааларын иһиттим. Салгыы үлэлииргэ, сайдарга истиҥ тыллары иһиттим. Саҥалыы оҥоһуулаах киин араас хайысхаларынан үлэлиир эбит, манна хас баҕарар саастаах киһи дьарыктаныан, бэйэ кыаҕын арыныан сөп. Олус үчүгэй», — диэн Артур Орлов эттэ.

СӨ бырабыыталыстыбатын бэрэссэдээтэлин солбуйааччы Ольга Балабкина «Бастакылар хамсааһыннара» эрэгийиэннээҕи салаатын бастакы настаабынньыгынан өрөспүүбүлүкэ баһылыга Айсен Николаев буоларын санатта. Бүгүҥҥү күҥҥэ хамсааһыҥҥа 21 тыһыынчаттан тахса настаабынньык баар.

«Биһиги Саха сиригэр эрэ буолбакка, бүтүн Арассыыйаҕа ураты буолар сана бырайыактары элбэх ыччаты кытта саҕалыыбыт. Билигин биһиги сүрүн сорукпут — хамсааһын кыттыылаахтарын ахсааннарын элбэтии, тоҕо диэтэххэ манна ыччат күүһүн уонна көҕүн көрөбүт», — диэн Ольга Балабкина бэлиэтиир.