Саха сиригэр Беларусьтан тимир суол саҥа маршрутунан элбэх таһаҕас кэлэр

Саха сиригэр Беларусь өрөспүүбүлүкэтиттэн тырааныспар-логистическай сибээһи сайыннарыы бырайыагын чэрчитинэн тимир суол саҥа маршрутунан бастакы таһаҕастар кэлитэлээн эрэллэр. Ил Дархан Айсен Николаев  «Якутия, вперед!» биэриигэ иһитиннэрбитинэн, инникитин таһаҕас тиэйиитэ өссө кэҥиэҕэ. Ол курдук, норуот туттар малыттан-салыттан саҕалаан бөдөҥ тиэхиньикэҕэ тиийэ кэлиэҕэ.

«Былырыын үлэбинэн Беларусь өрөспүүбүлүкэтигэр тиийэ сылдьыым уонна дуогабардаһыым олоххо киириитин чэрчитинэн, бэрэсидьиэн Александр Лукашенколыын көрсүһүү түмүгүнэн, билигин көхтөөх үлэ элбэх хайысханан ыытылла турар. Ол курдук, хайа байытар хампаанньаларбытыгар анаан БелАЗ курдук бөдөҥ тиэхиньикэттэн саҕалаан аска-үөлгэ тиийэ кэлиэҕэ. Бу үлэ чэрчитинэн, «Саха сирин тимир суоллара» үс нэдиэлэнэн Беларусьтан Саха сиригэр контейнердары тиэрдии өҥөтүн оҥоруохтара, онон бырайыак үлэтэ саҕаланна», — диэтэ Ил Дархан Айсен Николаев.