Саха сиригэр Бэрэсидьиэн оскуолаларын ситимин оруолун үрдэтиэхтэрэ

Айсен Николаев Саха Өрөспүүбүлүкэтин Бастакы Бэрэсидьиэнин оскуолаларын ситимин сайыннарыы боппуруостарыгар мунньах ыытта. Көрсүһүүгэ бэрэсидьиэн оскуолаларын үлэтин билиҥҥи түмүктэрин дьүүллэстилэр, ону тэҥэ өрөспүүбүлүкэ уопсай үөрэхтээһинин тиһигэр салгыы сайдыыларын торумнаатылар.

Айсен Николаев Саха сирин үөрэхтээһинигэр оскуолалар ситимнэрэ ураты оруоллааҕын уонна Саха сирэ каадырга, өй-санаа өттүнэн хайысхаларга сайдарыгар улахан суолталааҕын бэлиэтээтэ.

«Үөрэх үрдүк хаачыстыбатынан өрөспүүбүлүкэ атын оройуоннарын уонна куораттарын оскуолаларыгар холобур буолар, уопсай үөрэхтээһин таһымын үрдэтэргэ көмөлөһөр «маяк-оскуолалар» наадалар», — диэн Ил Дархан эттэ.

Мунньах кыттааччылара хас биирдии оҕо дьоҕурун арыйарга уонна выпускниктары аныгы кэм ирдэбиллэригэр бэлэмнииргэ туһуламмыт көдьүүстээх үөрэх эйгэтин тэрийиигэ болҕомтолорун уурдулар.

Үөрэх тэрилтэлэрин салайааччылара тэхиньиичэскэй уонна айылҕаны үөрэтэр хайысхалары олоххо киллэрии, ааптар бырагыраамаларын туһаныы, чинчийэр уонна бырайыактыыр үлэни сайыннарыы, ону тэҥэ дойду бастыҥ үрдүк үөрэҕин кыһаларын уонна научнай кииннэрин кытта бииргэ үлэ туһунан кэпсээтилэр.

Тыа сирин оскуолаларын үлэтигэр уонна хаачыстыбалаах үөрэҕи ыларга тэҥ усулуобуйаны тэрийиигэ ураты болҕомто уурулунна.  Айсен Николаев дьүүллэһии кэмигэр бэрэсидьиэн оскуолалара салгыы даҕаны үөрэх уларыйыыларыгар инники күөҥҥэ (флагман) сылдьыахтаахтарын бэлиэтээтэ.

«Өрөспүүбүлүкэ Бастакы Бэрэсидьиэнин оскуолаларын ситимигэр үөрэх хаачыстыбата Михаил Ефимович Николаев олохтобут үрдүк чыпчаалларыгар эппиэттиирин курдук дьулуһуохтаахпыт», — диэн кини эттэ.  Ил Дархан маны таһынан нуормалыыр баазаны тупсарыыга уонна оскуолалар ситимнэрин статуһун бөҕөргөтүүгэ болҕомтотун уурда.

«Өрөспүүбүлүкэҕэ үөрэхтээһин сайдыытын билиҥҥи кэрдиис кэмигэр Бастакы Бэрэсидьиэн оскуолаларын ситимин статуһун саҥаттан хаттаан көрөр наада. Кинилэри научнай сыһыаҥҥа уонна үөрэх хаачыстыбатын үрдэтиигэ туһуламмыт кииннэр быһыытынан араарыахха наада», — диэтэ Айсен Николаев.

Санаттахха, бэрэсидьиэн оскуолалара 1997 сыллаахха Саха Өрөспүүбүлүкэтин Бастакы Бэрэсидьиэнэ Михаил Ефимович Николаев көҕүлээһининэн Саха сирин үөрэҕириитин флагманнарын быһыытынан тэриллибиттэрэ.