Саха сиригэр бэтэрээннэргэ анаан мэдиссиинискэй уонна психологическай бырагыраамалар үлэлииллэр

Саха сиригэр анал байыаннай дьайыы бэтэрээннэрэ уонна кинилэр дьиэ кэргэттэрин чилиэннэрэ мэдиссиинэ уонна психологическай бырагыраамалар комплекстарын ааһыахтарын сөп. Бу туһунан брифинг кэмигэр Саха сиринээҕи «Аҕа дойдуну көмүскээччилэр» судаарыстыбаннай пуонда филиалын мэдиссиинэҕэ арыаллааһыҥҥа салайааччытын солбуйааччыта Татьяна Никифорова иһитиннэрдэ.

«Быйылгы сылга мэдиссиинэ уонна психологическай боппуруостарга 900-тэн тахса этии ылылынна уонна ырытылынна. 100-чэ гражданин Инбэлииттэри уонна успуорка мэдиссиинэ кэлимник реабилитациялыыр өрөспүүбүлүкэтээҕи социальнай-чэбдигирдэр киин баазатыгар мэдиссиинэ реабилитациялааһыныгар көмөнөн туһаннылар», — диэтэ кини.

Амбулаторнай уонна стационарнай мэдиссиинэ көмөтүнэн 400-чэ киһи, санаторнай-курортнай эмтэниинэн 60-тан тахса киһи туһанна. Байыаннай- быраас хамыыһыйатын уонна мэдиссиинискэй-социальнай эспэртииһэни ыытыыга көмө 30-тан тахса бэтэрээҥҥэ оҥоһулунна. Быйыл психологическай көмөнөн 300-тэн тахса киһи туһанна.

«Өрөспүүбүлүкэҕэ психолого- педагогическай арыаллааһын өрөспүүбүлүкэтээҕи методическай киинин кытта сөбүлэһии чэрчитинэн анал байыаннай дьайыы кыттыылаахтарын оҕолоругар психологическай көмөнү оҥоруу салҕанар. Бу кииҥҥэ хайысханы ыларга социальнай координаторга тиийиэххэ наада. Уопуттаах оҕо кириисиһин психологтара көрүүнү ыыталлар. Дьиэҕэ исписэлиис тахсарыгар кыах баар», — диэн эбэн эттэ Татьяна Никифорова.