Саха сиригэр аҕам саастаахтар спартакиадата ыытыллыаҕа

Бэс ыйын 7-8 күннэригэр Дьокуускайга аҕам саастаахтарга өрөспүүбүлүкэтээҕи спартакиада ыытыллыаҕа.

Аҕам саастаахтар успуорт тоҕус көрүҥэр күрэхтэһиэхтэрэ: чэпчэки атлетика, харбааһын, остуол тенниһэ, буулдьанан ытыы, саахымат, дартс, эстафета, ГТО нормативтарын толоруу уонна сарсыардааҥы сэрээккэ.

Спартакиада үөрүүлээх аһыллыыта сарсын, бэс ыйын 7 күнүгэр, сарсыарда 10:00 чаастан «Дохсун» успуорт уораҕайыгар буолуоҕа.

Күрэхтэһиигэ Саха сирин 25 муниципальнай оройуоннарыттан кыттыахтара, ону таһынан хоту оройуоннартан: Усуйаана, Орто Халыма, Өлөөн, Эдьигээн, Өймөкөөн уонна Эбээн Бытантай. Күрэхтэһии сүрүн судьуйатынан Альберт Трофимов ананна. Күрэх түмүгүнэн бу күһүн Бүтүн Арассыыйатааҕы спартакиада финалыгар кыттар Саха сирин сүүмэрдэммит хамаандата тэриллиэҕэ. Сиһилии бу сигэнэн көрүҥ: https://ufkims14.ru/