Саха сиригэр «Биир ньыгыл Арассыыйа» баартыйа бырайыактарын олоххо киллэрэр

Саха сирэ «Биир ньыгыл Арассыыйа» баартыйа норуот бырагырааматынан 18 федеральнай баартыйа бырайыагын үлэлэтэр. Бу бырайыактар дьиэ кэргэни уонна аҕа саастаах көлүөнэни өйөөһүҥҥэ, үөрэҕириини, доруобуйа харыстабылын, успуорду, култуураны, урбааны, тыа сирин сайыннарыыга, ону тэҥэ куттал суох буолуутун эйгэтин тэрийиигэ туһуланаллар.

Норуот бырагыраамата – бу дойду үрдүнэн олохтоохтортон киирбит 2,5 мөл. тахса этиигэ олоҕуран оҥоһуллубут стратегическай докумуон буолар. Докумуон олох бары сүрүн өрүттэрин таарыйар.

Арассыыйа Бэрэсидьиэнэ  Владимир Путин эппитинэн: «Норуот бырагыраамата – дойдуга буола турар быһыыга-майгыга сөп түбэһиннэрэн уларыйа, тупса турар тыыннаах докумуон».

Саха сиригэр маннык бырайыактар утумнаахтык ыытыллаллар: «Оҕо успуорда», «Куорат эйгэтэ», «Күөх экэниэмикэ», «Кэсиллээх чөл олох», «Устуоруйа өйдөбүлэ», «Куттала суох суоллар», «Түмсүүлээх дойду – тиийимтиэ эйгэ», «ОДьКХ оскуолата», «Арассыыйа дэриэбинэтэ», «Бигэ туруктаах дьиэ кэргэн», «Урбаан», «Дьахтар хамсааһына», «Мин карьерам», «Саҥа оскуола», «Кырдьаҕас көлүөнэ», «Төрөөбүт сир култуурата» уонна «Цифровой Арассыыйа».

Норуот бырагырааматынан Амма сэлиэнньэтигэр саҥа поликлиника аһылынна. Бу мэдиссиинэ киинэ биир симиэнэҕэ 200 киһини хабан көрөр кыахтаах уонна саҥа үйэ тэриллэринэн: рентген-аппарааттарынан, стоматологическай установканан, УЗИ, маммография аппаратынан толору хааччылынна. Амма улууһугар аан бастаан эндоскопическай стойка уонна ЛОР-комбайн баар буоллулар.

Өссө биир хайысханан ийэ уонна оҕо доруобуйатын харыстабылын систиэмэтин саҥардыы буолар. Хаҥалас оройуонун киин балыыһатыгар үлэ «Дьиэ кэргэн» национальнай бырайыак уонна «Бигэ туруктаах дьиэ кэргэн» баартыйа бырайыагын чэрчитинэн ыытыллар. Бырайыак чэрчитинэн 252-тэн тахса мэдиссиинэ тэрилэ атыылаһылынна, билигин толору аҕалылынна уонна туруорулунна.

Билигин Саха сиригэр «Биир ньыгыл Арассыыйа» баартыйаны 31 тыһыынчаттан тахса киһи өйүүр уонна бэйэтин сирин-уотун сайыннарар инфраструктура бырайыактарыгар көхтөөхтүк кыттар.