Саха сиригэр бүгүн үгүс улуустарынан ардах түһүөҕэ

Саха сиригэр үгүс улуустарынан ардах түһүөҕэ диэн күнү-дьылы кэтээн көрөөччүлэр билгэлииллэр.

Ленскэйгэ, Өлүөхүмэҕэ арҕаа, Мииринэйгэ, Сунтаарга, күнүс Нерюнгрига, Өлөөҥҥө, Эдьигээҥҥэ кыратык ардыыр, сорох сиринэн этиҥнээх ардах түһүөҕэ. Этиҥнээх ардах түстэҕинэ сөкүүндэҕэ 15-20 м/с диэри күүстээх тыалырыа. Уус Маайаҕа, Томпоҕо, Өймөкөөҥҥө кыратык ардыыр уонна кыра тыаллаах.

Салгын температурата түүн +4+9°С, соҕуруулуу-арҕаа +10+15°С, соҕуруу -2,+3°С, күнүс +22+27°С, соҕуруулуу-арҕаа +30°С диэри сылыйар, хотугулуу-арҕаа ардах түстэҕинэ  +12+17°С кыраадыс.

Дьокуускайга сөҥүүтэ суох, соуҕуруулуу-илинтэн сөкүүндэҕэ 3-8 м/с түргэннээх тыаллаах, күнүс 15-13 м/с күүстээх тыал түһүө. Салгын температурата түүн +5+7°С, күнүс +21+23°С кыраадыс сылаас.