Саха сиригэр быйыл 63 тыһ. туонна кэриҥэ үүтү бэлэмниир былааннаахтар

Ил Дархан Айсен Николаев Таатта улууһун Ытык Күөл сэлиэнньэтигэр өрөспүүбүлүкэ тыатын хаһаайыстыбатын сайыннарыы боппуруостарыгар сүбэ мунньаҕы ыытта. Мунньахха тыа хаһаайыстыбатын оҥорон таһаарыытыгар саҥа өйөбүл мэхэньииһимнэрин киллэрии уонна быйыл оту бэлэмнээһиҥҥэ бэлэмнэнии боппуруостара көрүлүннүлэр.

Айсен Николаев муниципальнай таһымҥа кэҥэтиллибит боломуочуйа суолтатын тоһоҕолоон бэлиэтээтэ уонна тыа хаһаайыстыбатын бородууксуйатын кээмэйин улаатыннарар үлэни салгыырга ыҥырда.

«От үлэтэ саҕаланна — сыл биир саамай тыҥааһыннаах кэмэ. Бу сезоҥҥа аграрийдар 435 тыһыынчаттан тахса туонна оту, 13 тыһыынчаттан тахса туонна сенаһы уонна 24 тыһыынча туонна сиилэһи бэлэмниэхтээхтэр.  Саҥа боломуочуйалар оройуоннарга көмөлөһөллөрүн көрөбүн. Муниципалитеттар кыра тыа хаһаайыстыбатын эбийиэктэрин туталлар, инвестицияны тардаллар, наадата суох бюрократията суох үлэлииллэр. Өрөспүүбүлүкэ ситиһиитэ мэллдьи дьон үлэтигэр олоҕурар. Биһиги аграрийдарбытыгар дьулуурдарын уонна үлэлэригэр тапталларын иһин махтанабын. Бу сезон бары соруктара толоруллуохтара диэн эрэллээхпин», – диэн Айсен Николаев бэлиэтээтэ.

Бу сыл тохсунньу 1 күнүттэн муниципальнай оройуоннар уонна куораттааҕы уокуруктар олохтоох салайыныы уорганнарын тыа хаһаайыстыбатын оҥорон таһаарыытын өйүүр боломуочуйаларын кэҥэттилэр. Билигин кинилэр кыра тыа хаһаайыстыбатын эбийиэктэрин тутуу боппуруостарынан дьарыктанар уонна онно инвестицияны тардар кыахтаннылар. Быйылгыттан олохтоох сирдэргэ тыа хаһаайыстыбатын сайыннарыыга боломуочуйаны олоххо киллэрэргэ бюрократическай ноҕуруусканы аччатар уонна инвестицияны күүһүрдэр саҥа мэхэньииһимнэр киллэрилиннилэр.

Оперативнай дааннайынан, бу сыл бастакы аҥаарыгар 24,9 тыһ. туонна  үүт бэлэмнэннэ. Бу ааспыт 2023 сыл итинник кэминээҕэр 14,6% элбэх. Өрөспүүбүлүкэҕэ быйылгы оту  бэлэмнээһиҥҥэ бэлэмнэнии үлэтэ ыытылынна.Сиэнэһи уонна сиилэһи  бэлэмнииргэ өрөспүүбүлүкэ бырабыыталыстыбатын муус устар 10 күнүнээҕи дьаһалынан, муниципальнай бырагыраамаларын үбүлээһиҥҥэ кыттыһарга судаарыстыбаннай бүддьүөттэн субсидиялар тыырыллыбыттара. Өрөспүүбүлүкэ бүддьүөтүттэн 100 мөл. солкуобай, оттон олохтоох бүддьүөттэртэн 167 мөл. солкуобай, холбоон 267 мөл. солкуобай көрүлүннэ.

2024 сылга 435,3 тыһ. тонна оту, 13,4 тыһ. тонна сиэнэһи  уонна 24,1 тыһ. тонна сиилэһи бэлэмниир былааннанар.