Саха сиригэр былааннаммыт оттон 10% охсулунна

Тыа хаһаайыстыбатын министиэристибэтэ иһитиннэрбитинэн, от ыйын 24 күннээҕи туругунан Саха сиригэр уопсайа 48 237 туонна от охсулунна. Бу быйылгы былаантан 10% буолар. 

Ааспыт нэдиэлэҕэ өрөспүүбүлүкэ киин уонна илин эҥэр улуустарыгар күүстээх ардахтар түһэннэр, оттооһун хаамыыта лаппа бытаарбыт. Ол эрэн охсуллубут оту ыйааһынынан ылан көрдөххүнэ, ааспыт сыллааҕы көрдөрүүттэн ордук — былырыын бу кэмҥэ 46 022 туонна от турбут эбит. Итиэннэ охсуллубут ходуһалары иэннэринэн ыллаххына былаантан хаалыы баар: 65 817 гектар (ааспыт сайын от ыйын бүтүүтэ 74 155 гектар этэ).

Билигин 2023 сыллааҕы уопсай от былааныттан 10% охсулунна. Былааны толоруу көрдөрүүлэринэн үс бастыҥ улуустарынан Уус Алдан (6 932 туонна — 20,71%), Мэҥэ Хаҥалас (5 593,5 туонна — 9,92%), Амма (4 449,5 туонна — 13,80%) буолбуттар.