Саха сиригэр быраастар дьахтар оһоҕоһуттан бүтүн хортуоппуйу хостообуттар

Чурапчы улууһугар 38 саастаах дьахтар куртаҕа сытыытык ыалдьан суһаллык балыыһаҕа киирбит. Быраастар ол күн эпэрээссийэ ыыппыттар уонна синньигэс оһоҕоско хаайтарбыт  бүтүн хахтаах хортуоппуйу булбуттар.

Чурапчытааҕы киин балыыһа бырааһа Илья Оконешников СИА-ҕа кэпсээбитинэн, ыарыһах сытыы оһоҕос ыарыылаах балыыһаҕа икки хонон эрэ баран киирбит. Дьахтар куртаҕа улаханнык ыалдьыбыт, иһэ үллүбүт, ол эрээри туох эрэ атын оһоҕоско хаайтарбыт диэн сэрэйбэтэх. Балыыһаҕа быраастар эпэрээссийэ ыытарга быһаарыы ылыммыттар. Бастаан утаа  оһоҕоско хам сыстыһыы үөскээбит диэн сабаҕалаабыттар. Эпэрээссийэ кэмигэр синньигэс оһоҕос иһигэр кытаанах, куртахха ситэ буспатах, бүтүннүү ыйыһыллыбыт хахтаах хортуоппуйу булбуттар. Хортуоппуй олус кытаанах буолан синньигэс оһоҕоһу бүөлээбит»,-диэн Чурапчытааҕы киин балыыһа хирург бырааһа Илья Оконешников кэпсээтэ.

Быраас этэринэн, эпэрээссийэ ситиһиилээхтик ааспыт. Онон ыарыһах эпэрээссийэ кэнниттэн  сарсыныгар атаҕар турбут уонна сотору кэминэн балыыһаттан тахсарга бэлэмнэнэр.