Саха сиригэр бүттүүнүгэр ойуур баһаардарынан ыксаллаах балаһыанньа эрэсиимэ биллэрилиннэ

Саха сиригэр куйаас күн-дьыл сатыылаан уонна этиҥтэн сылтаан ойуур баһаардарын эбиллиитигэр төрүөтүнэн буоллулар. Онон сибээстээн эрэгийиэн сиригэр-уотугар бүттүүнүгэр ыксаллаах балаһыанньа эрэсиимэ биллэрилиннэ.

Бу туһунан от ыйын 3 күнүгэр, ыксаллаах балаһыанньаны сэрэтиигэ уонна туоратыыга, баһаартан куттал суох буолуутун хааччыйыыга хамыыһыйа мунньаҕар өрөспүүбүлүкэ баһылыга Айсен Николаев иһитиннэрдэ.

Туһааннаах ыйаахха бүгүн Саха сирин Ил Дархана илии баттаата. ЫБМ эрэсиимэ баһаардары умулларыы миэрэлэрин күүһүрдэргэ, ону тэҥэ күүһү уонна сэби-сэбиргэли элбэтэргэ төһүү буолуоҕа, ол иһигэр федеральнай киини кытыннаран. Муниципалитеттар таһымнарыгар маннык эрэсиим Уус Маайаҕа уонна Өлүөхүмэ оройуоннарыгар биллэриллибитэ.

“Бүтэһик нэдиэлэҕэ өрөспүүбүлүкэҕэ аномальнай өҥүрүк куйаас сатыылаата. Саха сиригэр бүгүн дойду үрдүнэн саамай үрдүк температура бэлиэтэнэр, +30 кыраадыстан быдан үрдүк. Билигин маассабайдык этэр кураанах этиҥ түмүгэр кэнники күннэргэ күн аайы 10-20 баһаар умулларыллыбытын үрдүнэн, баһаар ахсаана 20-30 элбиир. Билигин салгыы балаһыанньа уустугурбатын туһугар күүһүрдүллүбүт миэрэлэри ылыныахтаахпыт”, — диэтэ Айсен Николаев.

Уопсайа от ыйын 3 күнүгэр 61164 гектар иэннээх сиргэ 110 ойуур баһаара уонна 3185 га-ҕа 2 сиринэн баһаар бэлиэтэннэ. Үксүн уустук уонна тэйиччи сиргэ-уокка умайыы таҕыста. Баһаары 620 киһи, 33 автотиэхиньикэ уонна авиация умуллараллар. Ол да буоллар, күүһү уонна сэби-сэбиргэли харыстанар сирдэргэ бастакы уочарат элбэтиллиэҕэ, ону тэҥэ хонтуруолланар зонаҕа, итинтэн баһаардар хааччыллар зонаҕа тэниийэхтэрин сөп.

От ыйын 4 күнүгэр эрэгийиэннэр икки ардыларынааҕы маневр чэрчитинэн баһаарынай сулууспа парашютнай-десантнай бөлөҕө 50-тан 146 киһиэхэ диэри күүһүрдүллэр. Эрэгийиэн бырабыыталыстыбата Бурятияҕа, Приморскай уонна Забайкальскай кыраайдарга ПДПС бөлөҕүн салгыы улаатыннарыыга көмө көрдөөтө.

Ордук уустук балаһыанньа бүгүн Уус Маайа оройуонугар үөскээтэ, манна ойуур 34 баһаара бэлиэтэннэ, ону тэҥэ Саха сирин соҕуруулуу-илин өттүгэр. Үксүн хайалаах сир буолан, умулларыыны уустугурдар. Чугастааҕы кэмҥэ миэстэтигэр эрэгийиэн баһылыгын сорудаҕынан үлэлэри сүрүннүүргэ “Якутлесресурс” ГАУ салайааччыта Виктор Омуков командировкаҕа барыаҕа. Ону тэҥэ Айсен Николаев Арассыыйа ЫБМ эрэгийиэннээҕи управлениетын аэромобильнай бөлөҕүн умайыыны умулларыыга туһанарга соруйда.

Статистика көдөрөрүнэн, хааччыйыы зонатыгар ойуур баһаарын 60 тахса % булуллубут бастакы сууккатыгар умулларыллар. Ол эрээри күн-дьыл усулуобуйатыттан булуллубут баһаар элбээн иһэр. Муниципальнай тэриллиилэр баһылыктарын мунньаҕар умулларыыга олохтоохтору кытыннарыы ахсаанын элбэтэргэ этилиннэ. Үтүө холобур быһыытынан Айсен Николаев Өлүөхүмэ оройуонун ааттаата.

“Миэстэтигэр үлэни күүһүрдүөххэ. Муниципалитеттар баһылыктара ойуур баһаардарын умулларыыга үөһэттэн ыйыыны кэтэспэккэ дьаһаммыт сирдэригэр балаһыанньаны хонтуруолга туталлар, оттон баһаарынайдары таһыттан кэтэһэ олорооччуларга мөлтөх”, —диэтэ өрөспүүбүлүкэ баһылыга.

Айсен Николаев авиацияны элбэтэргэ соруйда. Бүгүн авиаботурууллааһыҥҥа салгын 17 суудуната 17 оройуоҥҥа уонна Дьокуускай тулатыгар ыытар, умулларыыны – салгын 4 суудунатынан. Зондировщик-сөмөлүөттэр туһанылларга бэлэмнэр, итилэртэн биирдэстэрэ – Хаҥалас оройуонугар, иккиһэ – Алдан уонна Өлүөхүмэ оройуоннарыгар үлэлиэхтэрэ. Арассыыйа ЫБМ ГУ иһитиннэрбитинэн, ону тэҥэ Саха сирин сайаапкатынан Саха сиригэр Бе-200 ЧС сөмөлүөт-амфибиялар кэлиэхтэрин сөп.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Хаартыскаҕа Андрей Сорокин түһэриитэ, СИА