Саха сиригэр Бүтүн Арассыыйатааҕы «Белый мир Арктики через призму детской книги» кыайыылаахтарын наҕараадалаатылар

СӨ Бырабыыталыстыбатын бэрэссэдээтэлин солбуйааччы Ольга Балабкина IV Арассыыйатааҕы куонкурус кыайыылаахтарын «Белый мир Арктики через призму детской книги» кыайыылаахтарын наҕараадалаата.

Быйыл куонкурус «Полет стерха» бырайыак чэрчитинэн, улуу Кыайыы 80 сылын көрсө ыытыллыбыта.

«Полет стерха» бырайыак былырыын Илиҥҥи экэнэмиичэскэй пуорумҥа «Экологическое благополучие и экономическая незвисимость» диэҥҥэ билиһиннэриллибитэ.

Ольга Балабкина этэринэн, Улуу Кыайыы 80 сылынан  кыталык, туруйа уобараһа дириҥ суолталаах.

«Уратыта, быйылгы куонкурус кыталыкка анаммыта буолар, Бу үгүс хотугу норуоттарга духуобунай символ буолар. Саха сиригэр кыталык уобараһа — өбүгэлэрбит ситимнэрэ буолар», — диэтэ.

Куонкурус тэрийээччитэ, Дьокуускай куорат киин бибилэтиэкэлэрин ситимин дириэктэрэ Нюргуяна Решетникова куонкурус 2021  сыллаахха бастакытын ыытыллыбытын туһунан эттэ. Онтон ыла куонкурус кыттыылаахтарын географията кэҥээбит. Бу сылга 147 айар үлэ киирбит. Ол курдук Нижегородскай, Калининградскай, Тверь, Брянскай, Тюмень, Иркутскай, Амур, Архангельскай уобаластартан, Ямало-Ненецкэйтэн, Ставропольскай кыраайтан, Хакасия, Саха сирэ өрөспүүбүлүкэлэртэн кыттыбыттар.  Маны сэргэ, Кытайтан үлэлэр киирбиттэр.