Саха сиригэр бүтүн Арассыыйатааҕы «Тиэргэнинэн ыллыыбыт» аахсыйа саҕаланна

Саха сиригэр ыам ыйын 6 күнүгэр «Тиэргэнинэн ыллыыбыт» бүтүн Арассыыйатааҕы аахсыйа буола турар. Аҕа дойду Улуу сэриитин бэтэрээннэрэ эҕэрдэлэри туталлар.

Артыыстар, уопсастыбанньыктар уонна Дьокуускай куорат олохтоохторо Сергей Степанович Прихожаны, Петр Константинович Яковлевы, Кирилл Егорович Павловы, Валентина Васильевна Ефремованы, Наум Трифонович Слепцову, Мартын Герасимович Григорьевы, Роман Тихонович Николаевы эҕэрдэлээтилэр.

Биһиги бэтэрээннэрбит хорсун быһыыларын уонна үлэҕэ ситиһиилэрин кинилэр наҕараадалара уонна бочуоттаах ааттара туоһулууллар. Кинилэр олоххо олус көхтөөхтөр.

Дьокуускайга Эстрада тыйаатырын уонна «Туймаада» ансаамбыл артыыстара Аҕа дойду Улуу сэриитин бэтэрээннэрэ олорор тиэргэннэригэр сэттэ аадырыска кытыннылар. Кинилэр «Темная ночь», «Туруйалар», «Смуглянка», «Синий платочек», «День Победы», «Долгунча», «Хайыhар» уо.д.а. ырыалары ыллаатылар.

Патриотическай аахсыйаҕа олохтоохтор, СӨ Ыччат дьыалаларыгар уонна социальнай коммуникацияларга министиэристибэ үлэһиттэрэ, бэтэрээннэр сэбиэттэрэ, куорат управалара кытыннылар.

Бүгүн Саха сиригэр Аҕа дойду Улуу сэриитин 16 кыттыылааҕа, Ленинград блокадатын туораабыт 13 киһи, уруккута толору сааһын ситэ илик 12 хаайыылаах уонна 2178 тыыл бэтэрээнэ олорор. Кинилэртэн биир да киһи болҕомтото суох хаалыа суоҕа.

 

СӨ Ил Дарханын уонна Бырабыыталыстыбатын пресс-сулууспата.