Саха сиригэр дьахталлары албыннаабыт Нигерия олохтооҕо 10 сылга холуонньаҕа хаайылынна

Ленскэй оройуонун суута Нигерия 24 саастаах олохтооҕо дьахталлартан 9 мөлүйүөн солкуобайтан тахса сууманы уорбутун иһин бириигэбэри таһаарда. Бу туһунан СӨ Сууттарын холбоһуктаах пресс-сулууспатыгар иһитиннэрдилэр.

«Эр киһи тэрээһиннээх бөлөххө киирбит. Бу дьон ыраахтан олорон харчы уораллар эбит. Бөлөххө тэрийээччилэр, координатордар уонна посредниктар киирэллэрэ быһаарыллыбыт», — диэн СӨ Сууттарын холбоһуктаах пресс-сулууспата суруйар.

Дьон харчытын ылаары түөкүттэр дьахталлары кытта суруйсаллар эбит. Ол кэннэ түөкүттэр албыннаан үбү-харчыны көрдөөн ылаллара билиннэ. Тугу да сэрэйбэт дьахталлар харчыларын ыыта олорбуттар. Ол кэннэ Ниегрия олохтооҕо түөкүттэргэ бааннарын каарталарыгар үбү-харчыны ыыталаабыт.

Түмүгэр араас уобаластан, ол иһигэр Саха сирин киллэрэн туран, биэс дьахтар 9,1 мөлүйүөнтэн тахса солкуобайы сүтэрбиттэр.

Нигерия олохтооҕуттан төлөпүөнүн уонна макбугун судаарыстыба дохуотугар былдьаабыттар. Суут кэмигэр эр киһи буруйун билиммэтэх. Холуонньаҕа 10 сыл болдьоххо хаайылынна.