Саха сиригэр “Дети столетия”   хапытаалы 7,5 тыһыынча дьиэ кэргэн ылла

Арассыыйаҕа Дьиэ кэргэн уонна Саха сиригэр Оҕо саас сылларыгар тоҕус ый устата 7499 дьиэ кэргэн “Дети столетия” тус сыаллаах хапытаалы ылла. Бу туһунан өрөспүүбүлүкэ Үлэҕэ уонна социальнай сайдыыга министиэристибэтэ иһитиннэрдэ.

Бу өрөспүүбүлүкэ  100  сылыгар олохтоммут миэрэни эрэгийиэн баһылыга Айсен Николаев быһаарыытынан өссө биэс сылга – 2027 сылга диэри уһатыллыбыта.

Быйыл тус сыаллаах хапытаал кээмэйэ индексацияны учуоттаан 110 тыһыынчаттан тахса солкуобайга тэҥнэһэр.

2024 сыл алтынньы 2 күнүнээҕи туругунан, бу сыл саҕаланыаҕыттан хапытаалы дьон олорор усулуобуйаларын саҥардыыга (3830 сайабылыанньа) уонна тырааныспары м атыылаһыыга (963 сайабылыанньа) туһаннылар.

94 дьиэ кэргэн бу харчыны оҕолоро үөрэнэллэригэр, 30 дьиэ кэргэн – бааннарга уурдарыыларыгар, 24 дьиэ кэргэн – кэтэх хаһаайыстыбаларын сайыннарыыга туттубуттар. 18 ыал дойду иһигэр сынньаммыт, 14 ыал оҕолоругар үрдүк технологиялаах мэдиссиинэ көмөтүн оҥотторууга уонна сонотуоруйга эмтэтиигэ, 6 ыал олорор дьиэлэрин гаастааһыҥҥа, 1 ыал оҕолорун олоҕун уонна доруобуйатын страховкалааһыҥҥа туттубуттарын туһунан этиллэр.

Айсен Николаев сорудаҕынан тус сыаллаах хапытаалы толотторуу уонна ылыы судургутуйбута. Хапытаал сайабылыанньата уонна социальнай көмүскэл уорганыгар сылдьыыта суох ананар. Төрөппүттэр РФ граждана уонна Саха сиригэр олорор, ону тэҥэ ЗАГС уорганыгар оҕолоро төрөөбүтүн туһунан сибидиэтэлистибэни ылыахтаахтар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата