Саха сиригэр «Дьиэ кэргэн хамаандата» Бүтүн Арассыыйатааҕы успуорт бэстибээлэ салҕанар

Дьокуускай куорат Култуура уонна сынньалаҥ пааркатыгар 23 дьиэ кэргэн хамаандатыттан 82 кыттааччы успуорт ориентированиетыгар күрэхтэһиигэ кытыннылар.

Тэрээһин «Дьиэ кэргэн хамаандата» Бүтүн Арассыыйатааҕы успуорт бэстибээлин чэрчитинэн ыытылынна. Хамаандаҕа хайаан даҕаны биир дьиэ кэргэн 7-н 17-гэр диэри саастаах оҕолоох дьиэ кэргэн чилиэннэрэ буолуохтаахтар.

Күрэхтэһии «Кросс-выбор» дьиссипилиинэнэн ыытылынна. Кыттааччылар саастарынан бөлөхтөргө арахсан каартанан хонтуруолунай пууннар чыыһылаларын булуохтаахтара.

Тыҥааһыннаах киирсиилэр түмүктэринэн дьиэ кэргэн хамаандатын зачетугар бастакы миэстэни үс бастыҥ көрдөрүүнү ситиһэн Павловтар дьиэ кэргэн ыллылар. Иккис миэстэни Гуляевтар, үсүһү Сивцевтэр дьиэ кэргэттэрэ ыллылар.

Күрэхтэһиини «Бастакылар хамсааһыннара» Арассыыйатааҕы оҕо уонна ыччат уопсастыбаннай-судаарыстыбаннай хамсааһынын Саха сиринээҕи салаата уонна Өрөспүүбүлүкэ успуорт ориентированиетыгар федерацията тэрийэн ыыттылар диэн СӨ Баһылыгын уонна Бырабыыталыстыбатын пресс-сулууспата иһитиннэрэр.