Саха сиригэр дьиэ кэргэҥҥэ атаҕастаныыттан сэрэтэр сокуону ылынарга этии киллэрдилэр

Саха сиригэр дьиэ кэргэҥҥэ атаҕастаныыттан сэрэтэр сокуону ылынарга этии киллэрдилэр. 

«Атаҕастаныыттан дьиэ кэргэн быраабын көмүскээһин» диэн төгүрүк остуолга Нам улууһун Сэбиэтин дьокутаата Кира Аммосова тыл эттэ.

Дьокутаат этэринэн, Саха сиригэр дьиэ кэргэҥҥэ атаҕастаныы балаһыанньата олох-дьаһах укулаатыттан уонна үгүс нэһилиэнньэлээх пууннар ыраах сыталларыттан өссө уустугурар. Кира Аммосова ону таһынан «Эн соҕотох буолбатаххын, эйигин кытта Саха сирэ» диэн  тэрилтэ үлэтин туһунан кэпсээтэ.

«2023 сыл сэтинньитигэр үлэ саҕаламмытыттан дьахталлартан уонна кыргыттартан 800-тэн тахса сайабылыанньа киирбит. Дьон орто сааһа – 23-32. Бу ордук оҕо төрөөһүнүн кытта кэмҥэ көмүскэлэ суох буолууга сыһыаннаах. Ити кэмҥэ дьахталларга социальнай өйөбүл уонна көмүскэл ордук наадалаах. Быраабы көмүскээччилэр, волонтердар, психологтар уонна юристар түмсүүлэрин күүһүнэн 500-тэн тахса дьахтарга көмө оҥоһулунна, тоҕус холуобунай дьыала тэрилиннэ», — диэтэ кини.

Аммосова бэлиэтээбитинэн, ити эйгэҕэ элбэх биэдэмистибэ, бырагыраама уонна тэрээһин баарын үрдүнэн, дьиэ кэргэҥҥэ атаҕастабылтан сэрэтэр сокуон ылыллара наадалаах.

«Дьиэ кэргэҥҥэ атаҕастабылы сэрэтэр сокуону ылыныахха наада, ол эмсэҕэлээбит дьону көмүскүүр чопчу мэхэньииһимнэри киллэриэ. Хас биирдии биэдэмистибэҕэ уонна тэрилтэҕэ дьиэ кэргэҥҥэ атаҕастабылтан сэрэтии биир кэлим тиһигэр оруола, сыала-соруга чопчуланан суруллар сүбэлэри оҥоруохха. Улуустарга уонна куораттарга кириисис кииннэрин сайыннарыахха. Дьиэ кэргэҥҥэ атаҕастабыл иһин эппиэтинэһи күүһүрдүөххэ, ол иһигэр эмсэҕэлээччигэ чугаһыыры бобор дьаһаллары киллэриэххэ», — диэн Кира Аммосова бэлиэтээтэ.

«Атаҕастаныыттан дьиэ кэргэн быраабын көмүскээһин» төгүрүк остуол үлэтигэр муниципальнай оройуоннар салайааччылар, дьокутааттар уонна уопсастыбаннай тэрилтэлэрин бэрэстэбиитэллэрэ кытыннылар.