Дьиэ кэргэҥҥэ буруйу оҥоруу ахсаана 8,6%-нан намтаабыт

Саха сиригэр бу сыл тоҕус ыйын түмүгүнэн дьиэ кэргэҥҥэ сыһыаннаах бэлиэтэммит буруйу оҥоруулар ахсаана 8,6%-нан намтаабыт.

Маннык дааннайдары алтынньы 30 күнүгэр Ил Түмэҥҥэ буолбут «Атаҕастаныыттан дьиэ кэргэн быраабын көмүскээһин» төгүрүк остуолга өрөспүүбүлүкэтээҕи ИДьМ участковай боломуочунайдарын уонна сокуоннай саастарын ситэ илик оҕолор дьыалаларыгар подразделениелар үлэлэрин тэрийэр отделын начаалынньыга, полиция полковнига Михаил Иванов тыл этэригэр иһитиннэрдэ.

«Ааспыт тоҕус ыйдааҕы статистика көрдөрөрүнэн, дьиэ кэргэҥҥэ бэлиэтэммит буруйу оҥоруулар ахсаана 8,6%-нан аҕыйаабыт үчүгэй көстүү бэлиэтэнэр. Ол иһигэр ыар уонна ордук ыар буруйу оҥоруулар – 4%-нан. Дьиэ кэргэҥҥэ сыһыаннаах барыта 373 холуобунай дьыала силиэстийэлэннэ», — диэтэ Иванов.

Онуоха дьиэ кэргэҥҥэ сыһыаннаан оҥоһуллубут киһини өлөрүү уонна өлөрө сатааһын ахсаана 10-тан 13-кэ диэри улааппыт. Дьиэ кэргэҥҥэ сыһыаннаах силиэстийэлэммит холуобунай дьыалалары ырытыы көрдөрөрүнэн, буруйу оҥоруулар улахан аҥаарын эр дьон оҥорбуттар – 73,4%, оттон дьахталлар өлүүлэригэр — 26% тиксэр.