Саха сиригэр олохтоох туризмы сайыннарыахтара

Дьиэтээҕи туризмы сайыннарыы Саха сирин туризмын 2030 сылга диэри сайыннарыы стратегиятын биир сүрүн хайысхата буолла. Ол чэрчитинэн, улуустарга саҥа маршруттары, туристическай өҥөлөрү оҥоруохтара.

Саха сирин туризмын уонна территориальнай маркетинын сайыннарыы ааҕыныстыбатын дириэктэрэ Спиридон Сивцев кэпсээбитинэн, олохтоох  туризм диэн — өрөспүүбүлүкэ иһигэр араас похуоттары, култуурунай-сырдатар экскурсиялары, тиэмэлээх бырааһынньыктары, бэстибээллэри, дьыалабыай айаннары тэрийии, аймахтарга ыалдьыттаһыы буолар.

Онон улуустар маннык маршруттары толкуйдаан, олоххо киллэрэллэригэр, бэйэлэрэ бренд толкуйдуулларыгар анаан сыл аайы куонкурус ыытыахтара. «Якутия-36» мотивационнай бырагыраама оҥоһуллуоҕа.

Стратегия олоххо киирдэҕинэ, туристическай инфраструктура кэҥиэҕэ, каадырдары бэлэмнээһин күүһүрүөҕэ, саҥа сыыппара сервистэрэ үлэлиэхтэрэ.

2025 сылга олохтоох туризмы сайыннарар урбаанньыттарга 30 мөлүйүөн солкуобайы биэриэхтэрэ. Биир киһи 1 мөлүйүөн солкуобайы ылыан сөп. Манна кини бэйэтин харчытыттан кырата 50%-нын угуохтаах.

— 2030 сылга Саха сирин иһинэн айан ахсаана сылга 750 тыһыынчаҕа тиийэрин ситиһэр сорук турар. Стратегия туризмы сайыннарарга көҕүлүөҕэ. Урбаанньыттары өйүүргэ, инвестициялары киллэрэргэ туһулаан үлэлиибит, — диэн Спиридон Сивцев этэр.

2024 сылга Саха сиригэр 300 тыһыынча турист кэлэн барбыта, ол  иллэрээ сыллааҕар 25%-нан элбэх. 

Ил Дархан, бырабыыталыстыба пресс-сулууспата.