Саха сиригэр дотацияламмат улуус ахсаана биэскэ тиийдэ

СӨ үбүн миниистирин эбээһинэһин толорооччу Иван Алексеев СӨ Баһылыгын уонна Бырабыыталыстыбатын дьаһалтатын ситимнэригэр быһа эпииргэ тахсан, 2025 сыллааҕы бүддьүөт толоруллуутун туһунан кэпсээтэ.

Кини муниципальнай тэрээһиннэр нолуогу киллэриигэ олус көхтөөхтүк үлэлээбиттэрин бэлиэтээтэ.

«Биһиги бу үлэни бүтүн дойду үрдүнэн тарҕатар туһунан федеральнай салалтаҕа этии киллэрдибит. Урут Мииринэй уонна Ленскэй эрэ улуустара үп өттүнэн тутулуга суох буоллахтарына, кэлин Нерюнгри, Алдан эбиллибиттэрэ. Оттон бу сылтан Өймөкөөн улууһа эмиэ дотацияттан таҕыста. Нолуок киириитэ улуус бэйэтин ороскуотун уйунарыгар кыаҕы биэрэр», — диэн Иван Алексеев муниципалитеттар үлэлэрин үрдүктүк сыаналаата.

Миниистир ааспыт сылы уустук сыл диэн сыаналаата. Биир кэлим нолуок суотун тиһигэр киириини кытта сибээстээх кыһалҕалар баалларын быһаарда.

«2020 сылтан ыла бүддьүөт саҥа экэниэмикэ усулуобуйатыгар оҥоһулларын бэлиэтиэххэ наада. Ол да буоллар, бэйэ дохуотун үрдэтиигэ утумнаахтык үлэлиибит. Улахан тэрилтэлэри уонна атын управлениелары кытта кэтээн көрүү ситимнээхтик ыытыллар. Нолуок дохуотун былаана туолла диэххэ сөп, консолидированнай бүддьүөт – ол аата өрөспүүбүлүкэ уонна муниципальнай тэриллиилэр судаарыстыбаннай бүддьүөттэрэ – 100% туолла. Бүддьүөт ороскуота 351 млрд тахса солкуобайга толорулунна, аҥарын кэриҥэ социальнай эйгэҕэ ыытылынна. Биһиги өрөспүүбүлүкэбит иэс өттүнэн бигэ тирэхтээх субъекттар ахсааннарыгар киирэр», — диэтэ кини.