Саха сиригэр “ЭЙГЭ-2024” бириэмийэ анал аат испииһэгэ оҥоһулунна

“ЭЙГЭ-2024” архитектура уонна дизайн эйгэтигэр иккис өрөспүүбүлүкэтээҕи бириэмийэ эспиэрдиир сүбэтэ 10 анал ааттаах бириэмийэ иһин киирсэр дьон шорт-илиистэрин оҥордо. Финалистар испииһэктэрин Тутааччы күнүн бырааһынньыгын кэмигэр эттилэр диэн иһитиннэрдилэр Ил Дархан иһинэн үлэлиир Архитектура уонна куорат тутуутун управлениетыгар. 

2024 сылга “ЭЙГЭ” бириэмийэҕэ саамай элбэх сайаапка “Бастыҥ социальнай эбийиэк” анал аакка киирбит — 47, “Бастыҥ олбуор” анал аакка — 39 уонна “Бастыҥ уопсастыбаннай эйгэҕэ” — 33. Бастыҥнар кэккэлэригэр 20 улуустан уонна 22 куораттан 107 эбийиэк түбэспит.

“Шорт-илиискэ киирбит эбийиэктэр бу хайыы-үйэ кыайыылаахтарынан буолаллар. Хас биирдии бырайыак болҕомтону, билиниини ылар. Кыайыылааҕы талан ылар олус уустук буолсу. Бары анал ааттарга улахан күөн көрсүү буолла. Кыттааччы элбэҕэ бу биһиги өрөспүүбүлүкэбитигэр былааннаах үлэ барарын, хаачыстыбалаах эбийиэктэр тутуллалларын уонна дьон олороругар тупсаҕай эйгэ оҥоһулларын кэрэһилиир”, – диэтэ  Архитектура уонна куорат тутуутун управлениетын салайааччыта Любовь Папок.

Сүрүн архитектор этэринэн, хас биирдии анал аакка кыттааччы ахсаана бэриллибит сайаапка ахсааныттан уонна хаачыстыбалааҕыттан көрөн талыллыбыт, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.