Саха сиригэр элбэх оҕолоох ыаллар оскуоланы бүтэрэр оҕолоро орто анал үөрэххэ киирэллэригэр эбии өйөбүлүнэн туһаныахтара

Саха сирин баһылыга Айсен Николаев элбэх оҕолоох ыаллар оскуоланы бүтэрэр оҕолоро  өрөспүүбүлүкэҕэ наадалаах уонна  кэскиллээх идэлэри баһылыыр баҕалаахтарын өйүүр сыалтан орто анал үөрэххэ киирдэхтэринэ эбии өйөбүлү оҥорор туһунан ыйаахха илии баттаата.

Докумуон быһыытынан элбэх оҕолоох ыал оскуоланы бүтэрбит оҕото өрөспүүбүлүкэҕэ наадалаах уонна кэскиллээх идэни  баһылыырыгар орто анал үөрэх үөрэтэр бырагыраамата төлөбүрдээх буоллаҕына, төлөбүрүн сорҕотун уйунарыгар үөрэнэр кэмин устатыгар 50 тыһыынча солкуобай кээмэйдээх биирдэ бэриллэр харчынан көмө оҥоһуллар буолла.

Саха Өрөспүүбүлүкэтин бырабыыталыстыбатыгар 2024 сыл атырдьах ыйын 1 күнүгэр диэри дьиҥнээх ыйааҕынан олохтоммут биирдэ бэриллэр харчынан көмө усулуобуйатын уонна бэрээдэгин, үбүлээһинин быһааралларыгар сорудахтанна.

Бу өйөбүл балаҕан ыйын 1 күнүттэн саҕаланыа, диэн иһитиннэрэр СӨ баһылыгын уонна бырабыыталыстыбатын пресс-сулууспата.