Мария Васильева (СИА) түһэриитэ
Ил Дархан Айсен Николаев өрөспүүбүлүкэ национальнай-култуурунай холбоһуктарын, казачестволарын уонна конфессияларын бэрэстэбиитэллэрэ Саха сирин норуоттарын ассамблеятыгар СӨ норуоттарын национальнай култуураларын күнүн олохтуур туһунан этиилэрин өйөөтө.
Ассамблея чилиэннэрин кытары көрсүһүү судаарыстыбаннай бырааһынньык – Саха Өрөспүүбүлүкэтин күнүн көрсө Кулаковскай аатынан Норуоттар доҕордоһууларын дьиэтигэр ыытылынна.
«Мин Саха сирин норуоттарын ассамблеятын Саха Өрөспүүбүлүкэтин норуоттарын национальнай култуураларын күнүн олохтуур туһунан көҕүлээһини өйүүбүн. Саха сирэ норуоттар доҕордоһууларын, кинилэр икки ардыларыгар иллээх-эйэлээх, бииргэ буолууларын, Бүтүн Арассыыйатааҕы гражданскай идентичноһы бөҕөргөтүүлэрин холобурун көрдөрөр», – диэн Айсен Николаев тоһоҕолоон бэлиэтээтэ. Итиэннэ национальностар икки ардыларыгар эйэни уонна сөбүлэһиини бөҕөргөтүүгэ кылаатын иһин өрөспүүбүлэкэтээҕи Судаарыстыбаннай бириэмийэни олохтуур туһунан этии киллэрдэ.
Ил Дархан бэлиэтээбитинэн, өрөспүүбүлүкэҕэ Саха сирин төрөөбүт дойду оҥостубут,135 араас омук уонна норуот олорор, үлэлиир. Саха сирэ элбэх киһини олохсуйа кэлэргэ угуйар эрэгийиэнинэн буолар. Кэнники сылларга Саха сирэ оҕо төрөөһүнүнэн эрэ буолбакка, дьон кэлиитинэн, миграция элбэҕинэн кэҥиир.
«Саха сирэ – Уһук Илин уокуругар нэһилиэнньэтэ элбээбит соҕотох эрэгийиэнинэн буолар, дойдуга оҕо төрөөһүнүгэр сэттис миэстэни ылар. Ити көрдөрүү Саха сирин сайдыыта сөпкө баран иһэрин көрдөрөр – экэниэмикэ көрдөрүүтүн үрдээһинэ, дьон олоҕор сабыдыаллыыр – оҕо төрөөһүнэ эбиллэр, нэһилиэнньэ олоҕо уһуур. Ааспыт сыл түмүгүнэн Арассыыйаҕа аан бастаан, сэбиэскэй кэм кэнниттэн, уһун олохтоох дьон элбээбиттэрэ бэлиэтэммитэ», – диэтэ Айсен Николаев.
Ил Дархан ааспыт сылга Арассыыйа Бэрэсидьиэнэ үгэс буолбут духуобунай-сиэр-майгы сыаннастарын харыстыыр уонна бөҕөргөтөр туһунан ыйаахха илии баттаабытын санатта. Бу билиҥҥи историческай быһыыны-майгыны учуоттаатахха олус суолталаах диэн кини бэлиэтээтэ уонна өрөспүүбүлкэ Бырабыыталыстыбатыгар ыйыллыбыт ыйааҕы толорорго эрэгийиэннэҕи бырагырааманы ылынарга сорудахтаата. Өрөспүүбүлкэ баһылыга бу үлэҕэ национальнай общиналар уонна үгэс буолбут итэҕэллээх конфессиялар ис кыахтара туһаныллыаҕар эрэнэрин эттэ.
Дьокуускайдааҕы уонна Ленскэйдээҕи архиепископ Роман Ил Дархаҥҥа итэҕэллээх конфессиялары өйүүрүн иһин махтанна уонна бу үлэ салҕаныаҕар баҕарарын биллэрдэ.
Саха сирин хотугу аҕыйах ахсааннаах төрүт олохтоох норуоттарын ассоциациятын бастакы вице-бэрэсидьиэнэ Любовь Христофорова Ил Дархан Айсен Николаев быһаччы сорудаҕынан оҥоһуллубут «Эдэр табаһыт» бырагыраама көдьүүстээҕин бэлиэтээтэ уонна бэйэлэрэ бас билэр олорор дьиэтэ суох өрөспүүбүлүкэ бары табаһыттарыгар тарҕатарга этии киллэрдэ.
Нуучча общинатын бэрэссэдээтэлин солбуйааччы Екатерина Егорова СӨ Баһылыгын Гранын куонкуруһугар национальностар уонна конфессиялар икки ардыларыгар сыһыаннаһыы диэн хайысханы киллэрэргэ эттэ.
«Туган як» (Родной край) татаар култууратын киинин бэрэссэдээтэлэ Игорь Халилов Арассыыйаҕа ыытыллар федеральнай Сабантуй тэрээһинин 2024 с. ыытарга этии киллэрдэ. Оттон Саха сирин хотугу аҕыйах ахсааннаах төрүт олохтоох норуоттарын ассоциаициятын бастакы вице-бэрэсидьиэнэ Вячеслав Шадрин атырдьах ыйыгар ыытыллар Саха сирин юкагирдарын VII сийиэһин туһунан былааны кэпсээтэ.
Түмүккэ, Айсен Николаев Саха сирин норуоттарын ассамблеятыгар норуоттар икки арыдыларыгар или-эйэни олохтуур, доҕордоһууну бөҕөргөтөр үлэни ыыта сылдьалларыттан, үүнэн иһэр көлүөнэни патриотическай иитии иһин махтанарын биллэрдэ.
СӨ Ил Дарханын уонна Бырабыыталыстыбатын пресс-сулууспата
Өрөспүүбүлүкэтээҕи "Оһуокай" түмсүү Дархан этээччитэ Лариса Николаевна оскуола үөрэнэччилэрин дьарыктаабыта ыраатта. Туйах хатарааччылаах бастыҥ этээччибит…
Айсен Николаев Олоҥхо тыйаатырын Саха сирин норуоттарын култуурунай баайын эбийиэгинэн билинэр туһунан Ыйаахха илии баттаата.…
Дьокуускайга 4 №-дээх полиция отделын дьуһуурунай чааһыгар дьахтар суумкатын уордарбытын туһунан сайабылыанньа суруйбут. Кини киин…
Алааска, тыаҕа сылдьан хаһыытыыры, улаханнык айдаарары боболлорун билэргит буолуо. Ону таһынан өссө тугу сэрэтэллэрий, өйдөтөллөрүй?…
Айсен Николаев Судаарыстыбаннай Мунньахха (Ил Түмэҥҥэ) туһаайан этиитигэр дьиэ кэргэннээх үлэһиттэри өйүүр миэрэлэри олоххо киллэрэргэ…
Үгүс үбүлүөйдээх тэрээһиннэринэн баай Өлүөхүмэ улууһун 1-Нөөрүктээйитээҕи модельнай бибилэтиэкэҕэ, ааспыт нэдиэлэҕэ сылы түмүктүүр тэрээһин буолан…