Саха сиригэр өрүстэр ууларын таһыма нуорматтан үрдүөн сөп

Росгидромет уонна Арассыыйа Гидрометкиинэ быйылгы сааскы халаан билгэтин бэлэмнээтилэр. Хаар аһара элбэҕиттэн элбэх эрэгийиэҥҥэ уу ылар куттала үрдүк.

Ураты болҕомтоҕо Мурманскай уонна Смоленскай уобаластар, ону тэҥэ киин эрэгийиэннэр: Орловскай, Тульскай, Калужскай, Московскай, Рязанскай уонна Владимирскай уобаластар киирэллэр диэн Айылҕа министиэристибэтин пресс-сулууспата иһитиннэрэр.

Маннык балаһыанньа Поволжьеҕа — Ульяновскай, Самарскай, Нижегородскай уобаластарга, Татарстаҥҥа уонна Мордовияҕа үөскүүр. Сибиир соҕуруу өттүгэр (Алтай кыраайыгар, Новосибирскай уонна Кемеровскай уобаластарга) күн эмискэ сылыйдаҕына, хаар элбэҕэ улахан халааҥҥа тиэрдиэн сөп. Уһук Илиҥҥэ, ол иһигэр Саха сиригэр, Камчаткаҕа уонна Сахалиҥҥа өрүстэр ууларын таһыма эмиэ нуорматтан тахсыан сөп.

Билгэлээһини уу гидрологическай моделларын көмөтүнэн оҥороллор. Манна сөҥүү (хаар, ардах) кээмэйин, буор тоҥуутун дириҥин уонна сиигин, гидрологическай пуостар дааннайдарын — холобур, уу таһымын учуоттууллар. Маннык сыанабыл чуолкайа 70–80% тиийэр, бу Аан дойдутааҕы метеорологическай тэрилтэ стандартыгар үрдүк көрдөрүү буолар.

«Сааскы халаан туһунан чуолкайдаммыт билгэ кулун тутар 12 күнүгэр тахсыаҕа. Чуолаан бу кэмҥэ Росгидромет хаары кэмниир маршруттарын дааннайдара хас биирдии нэһилиэнньэлээх пууҥҥа кутталы чуолкайдыырга, эрдэтинээҕи барылы эппиэттээх сулууспаларга дьаһал ылынарга ыйыыга кубулутарга кыах биэриэхтэрэ», — диэн Айылҕа харыстабылын уонна экологияҕа миниистирэ Александр Козлов бэлиэтээтэ.