Саха сиригэр өссө 33 уопсастыбаннай сир тупсарыллара былааннанар

Быйыл «Олорор дьиэ уонна куорат эйгэтэ» национальнай бырайыагын чэрчитинэн «Тупсаҕай куорат эйгэтин тэрийии» бырайыагы олоххо киллэриигэ Саха сиригэр өссө 33 уопсастыбаннай сири-уоту тупсарыы былааннанар.

СӨ архитектураҕа уонна куорат тутуутугар салалтата иһитиннэрбитинэн, 21 эбийиэккэ тупсарыы үлэтэ федеральнай субсидия суотугар ыытыллыаҕа, оттон 12 эбийиэги саҥардыыга үп кыра куораттарга уонна баай устуоруйалаах сэлиэнньэлэргэ тупсаҕай эйгэни тэрийии Бүтүн Арассыыйатааҕы куонкуруһун түмүгүнэн тыырыллыа. Үбүлээһин уопсай кээмэйэ 923 мөл. солк. буолуоҕа.

Ол курдук, федеральнай субсидиянан Алдан оройуонун Аллараа Кураанаҕар «Оҕо куората», Амма улууһун Чапчылҕаныгар Ийэ искибиэрэ, Үөһээ Бүлүү улууһун Үөдүгэйигэр «Куҥку» паарката, Кэбээйи улууһун Сангаар бөһүөлэгэр оҕо былаһаакката, тупсарыллыаҕа, Ленскэй улууһун Витимигрэ уонна Пеледуйугар бөһүөлэктэр уопсастыбаннай сирдэрэ, Мэҥэ Хаҥалас улууһун Майа сэлиэнньэтигэр акваторий уонна успуорт зоната, Павловскайга киин паарка, Миирнэй оройуонун Айхал уонна Светлэй бөһүөлэктэригэр искибиэр, Миирнэй куоратыгар ботаническай саад, Удачнайга «Оҕо куората», Нерюнгрига «Арҕааҥы искибиэр», Өлүөхүмэ улууһун Кыыллаах нэһилиэгэр «Биэрэк үрдэ» паарка, Өлөөҥҥө «Таба – эбэҥки дууһата», Таатта улууһун Ытык Күөлүгэр биэрэк үрдэ, Хаҥалас улууһун Булгунньахтааҕар Сынньалаҥ уонна култуура паарката, Мохсоҕоллоох уонна Ой бөһүөлэктэригэр уопсастыбаннай сирдэр, ону сэргэ Дьокуускай куоракка Ф.К. Попов аатынан искибиэр тупсарыллыахтара.

Оттон Бүтүн Арассыыйатааҕы куонкуруһун түмүгүнэн Алдан куоракка «Орто-Сала» эко-паарка, Өлүөхүмэ куоратыгар паарка, Бэрдьигэстээх сэлиэнньэтигэр Кыайыы болуоссата, Үөһээ Бүлүү сэлиэнньэтигэр И.Н. Барахов аатынан искибиэр, Ленскэй куоракка Орджоникидзе уулуссатын хаамар сирэ, Уус Алдан улууһун Бороҕонугар Н.Н. Окоемов аатынан кытыл үрдэ, Миирнэй куоратыгар паарка, Нерюнгри куоратыгар Култуура паарката, Бүлүү куоратыгар «Ыллыыр кумах» биэрэк кытыла, Орто Халыма куоратыгар Кыайыы болуоссата, Мэҥэ Хаҥалас улууһун Майа сэлиэнньэтигэр «Кыайыы Аартыга», ону сэргэ Жатай бөһүөлэгэр Шамшин аатынан бульвар тупсарыллыахтара.

Санатан эттэххэ, национальнай бырайыактар Арассыыйа Бэрэсидьиэнэ Владимир Путин көҕүлээһининэн 2019 с. саҕаламмыттара.