Саха сиригэр өссө биир кыһыҥҥы суол аһылынна

Үөһээ Бүлүү улууһугар Бүлүү өрүс мууһа туран,  «Үөһээ Бүлүү – Хоро» хайысханан кыһыҥҥы суол үлэҕэ киирдэ.  4 туоннаҕа диэри ыйааһыннаах тырааныспар сылдьара көҥүллэннэ. Бүгүҥҥү туругунан Саха сиригэр барыта үс  кыһыҥҥы суол үлэлиир диэн РФ ЫБММ  управлениетыгар иһитиннэрдилэр.

Бэлиэтээн эттэххэ, Үөһээ Бүлүү улууһуттан ураты, Өлөөн уонна Эдьигээн улуустарыгар кыһыҥҥы муус суоллар аһыллыбыттара. «Өлөөн – Харыйалаах» уонна «Эдьигээн – Аэропорт» хайысхаларынан 3 туоннаҕа диэри ыйааһыннаах массыыналар сылдьаллара көҥүллэнэр. Кыһыҥҥы өрүс үрдүнэн суоллары тутуу уонна оҥоруу үлэтэ муус халыҥа тиэхиньикэҕэ куттала суох буолуутун хааччыйарга ситтэҕинэ саҕаланар. Аһыллар болдьоҕо муус дьиҥнээх туругуттан уонна күн-дьыл уларыйыытыттан көрөн сыҕарыйыан сөп.

Көҥүлэ суох мууска тахсыы иһин Саха Өрөспүүбүлүкэтин Административнай быраабы кэһии туһунан кодексатын 9.10 ыстатыйатынан административнай эппиэтинэс көрүллэр уонна ыстараап сүктэриллэр:

• гражданнарга – 3 тыһыынчаттан 5 тыһыынчаҕа диэри солкуобай;
• дуоһунастаах дьоҥҥо – 20 тыһыынчаттан 50 тыһыынчаҕа диэри солкуобай;
• юридическай сирэйдэргэ – 100 тыһыынчаттан 1 мөлүйүөн солкуобайга диэри.