Саха сиригэр өссө икки киһи сураҕа суох сүттэ

Саха сиригэр Мэҥэ Хаҥаласка уонна Өлүөхүмэ оройуоннарыгар сүппүт эр дьону көрдүүллэр. Ааспыт сууккаҕа атын оройуоннарга өссө икки киһи сүппүтүн туһунан иһитиннэрии киирбитин СӨ Быыһыыр сулууспата иһитиннэрэр.

Нерюнгри оройуонугар ыам ыйын 9 күнүгэр 1:05 чааска «112» нүөмэргэ киһи сүппүтүн туһунан эрийэн иһитиннэрбиттэр. 1973 с.т. эр киһи кэргэнин кыттан тыаҕа барбыт. «Нахот» баазатын аттыгар ойоҕун массыынаҕа хаалларан баран, бултуу барбыт. Ыйыллыбыт болдьоҕор кэлбэтэх, ойоҕо сарсыарда аҕыс чааска диэри күүппүт. Ыам ыйын 8 күнүгэр бу сирдэри үчүгэйдик билэр киһи көрдөөбүт да, булбатах. Ыам ыйын 9 күнүгэр эр киһини Нерюнгритааҕы Быыһыыр сулууспа икки быыһааччыта уонна ИДьМ үлэһитэ көрдүү барбыттар.

Орто Халыма улууһугар ыам ыйын 8 күнүгэр Биир кэлим диспетчерскэй-дьуһуурунай систиэмэҕэ дьахтар эрин көрдүүргэ көмөлөһөргө көрдөһөн эрийбит. 1992 с.т. эр киһи «КамАЗ» массыынанан Улахан Саһыр аартыгынан Саһар бөһүөлэгэр тиийиэхтээх эбит. Кини ыам ыйын 5 күнүттэн сибээскэ тахсыбатах. Быһылааны Быыһыыр сулууспа хонтуруоллуур.