Саха сиригэр феноллаах дьиэлэри барытын суох оҥорору былаанныыллар

Саха сиригэр фенол-резоллаах пенопласт панеллартан тутуллубут олорор дьиэлэри инвентаризациялааһын ыытыллар.

Бастакы вице-премьер Дмитрий Садовников иһитиннэрбитинэн, бу өссө ааспыт үйэҕэ тутуллубут 139 сиэрийэлээх дьиэлэр. Бу туһунан СӨ Ил Дарханын уонна Бырабыыталыстыбатын упресс- сулууспата суруйар.

«ССРС саҕана дойду үрдүнэн маннык дьиэлэр тутуллубуттара балачча элбэх,  биһиги өрөспүүбүлүкэбитигэр эмиэ. Билигин бу технологиянан тутуллубут дьиэлэр киһи доруобуйатыгар  кутталы суоһуурун бары билэллэр», — диэтэ Дмитрий Садовников. Кини этэринэн, билигин Саха сирин үрдүнэн маннык 106 олорор дьиэ баар, уопсайа 43 тыһыынчаттан тахса квадратнай миэтэрэ иэннээх. Итинтэн 53-һэ Дьокуускайга, 22-тэ Абый оройуонугар, 18-һа — Анаабырга, 13-һэ — Кэбээйигэ бааллар. Испииһэк инвентаризация түмүгүнэн саҥардыллыа.

Уопсайа 25 тыһ. тахса кв.м. иэннээх 51 дьиэ аварийнай туруктаах: мантан икки дьиэ 2017 сылга диэри ыстаатыһы ылбыта уонна көһөрүү бырагырааматыгар билиҥҥи түһүмэҕэр киллэрилиннилэр, атыттар саҥа түһүмэх чэрчитинэн ыытыллара былааннанар.

«Биһиги сүрүн сорукпут — бары феноллаах дьиэлэри суох оҥоруу. Муниципалитеттары кытта дьиэлэр испиигэһин саҥардыахха наада. Кутталлаах эттиги чинчийиигэ салгын атмосфератын эспэртииһэтин ыытар сорук турар. Онуоха чопчу салгын температуратыгар оҥоһуллуон наада», — диэн быһаарда Дмитрий Садовников.

Дмитрий Садовников министиэристибэлэр чугастааҕы сылларга бары фенолаах дьиэлэри суох оҥорорго бу кыһалҕаны күүскэ ылсарын бэлиэтээтэ. Кини этэринэн бырабыыталыстыбаҕа көмөнү итиннэ Судаарыстыбаннай дуума дьокутаата Галина Данчикова оҥорор — федеральнай өйөбүлү ылыыга кыһамньытын уурар.