Саха сиригэр «Газпромбаан» вице-бэрэсидьиэнэ Сергей Фурсенко үлэлээтэ

«Газпромбаан» вице-бэрэсидьиэнэ, «Үрдүкү технологиялаах мэдиссиинэ көмөтө» аһымал пуондатын сэбиэтин бэрэссэдээтэлэ Сергей Фурсенко Саха сиригэр оробуочай сырыытынан үлэлээтэ, СӨ Ил Дархана Айсен Николаевы кытта көрүстэ. Бу туһунан www.sakha.gov.ru саайт суруйар. Көрсүһүү сүрүн тиэмэтинэн доруобуйаларынан хааччахтаах дьону өйөөһүн уонна чөлүгэр түһэрии боппуруостара буоллулар.

«Биһиэхэ байыаннай дьайыы кыттыылаахтарыгар көмө систиэмэлээх буолара уонна төһө кыалларынан эрдэ саҕаланара тутаах суолталаах. Бу мэдисиинэ технологияларын эрэ тустарынан буолбатах, ону таһынан дьону толору олоххо, социальнай көххө уонна кэлэр кэскилгэ эрэллээх буолууга төннөрүү туһунан буолар», – диэн Айсен Николаев бэлиэтээтэ.

Ыар эчэйиилэри ылбыт байыаннай сулууспалаахтарга аадырыстаах көмөнү оҥоруу боппуруостарыгар ураты болҕомто уурулунна. Байыаннай дьайыы кыттыылаахтарын эрдэтээҥи чөлүгэр түһэрии боппуруостара туспа блогунан дьүүллэһилиннилэр. Чуолаан, доруобуйаларынан хааччахтаах дьоҥҥо анаан адаптивнай картинг оскуолатын ыытыы уопута билиһиннэрилиннэ. Бу формат физическэй көҕү уонна психологическай адаптацияны дьүөрэлиир комплекснай чөлүгэр түһэрии элеменын быһыытынан көрүллэр.

Көрсүһүү кыттыылаахтара пуонда байыаннай дьайыы кыттыылаахтарын адаптивнай успуорт көрүҥнэригэр, бастатан туран – картиҥҥа, уһуйан комплекснайдык чөлүгэр түһэрэр уопутугар ураты интэриэһи көрдөрдүлэр.

Дьокуускайга Сергей Фурсенко РФ успуорт миниистирин сүбэһитин быһыытынан Чөмпүйүөннэр баалларыгар кытынна. Өрөспүүбүлүкэ спортивнай хамсааһыныгар түмүктүүр тэрээһиҥҥэ Арассыыйа успуордун этикатын хартията ылылынна.

«Бу сыл от ыйын 15 күнүгэр Успуорт министиэристибэтин коллегиятыгар Арассыыйа успуордун этикатын хартията ылыллыбыта. Бу хартияҕа биһиги сүрүн сыаннастарбыт бэлиэтэнэллэр, уонна бу хартия ааттаах-суоллаах күрэсчиттэрэ эрэ буолбакка, спортивнай суолларын саҥа саҕалыыр оҕолорго, ыччаттарга олус суолталаах», – диэн РФ успуорт миниистирин сүбэһитэ Сергей Фурсенко эттэ.

«Газпромбаан» вице-бэрэсидьиэнэ Сергей Фурсенко Саха сиригэр үлэ сырыытын түмүгүн быһааран, Саха сирин бастакы вице-премьерэ Дьулустаан Борисов эрэгийиэн «Үрдүкү технологиялаах мэдиссиинэ көмөтө» аһымал пуондатын кытта бииргэ үлэлииргэ уонна өрөспүүбүлүкэҕэ чөлүгэр түһэрэр бырагыраамалары сайыннарыыга, үрдүкү технологиялаах мэдиссиинэ көмөтө тиийимтиэ буолуутун үрдэтиигэ туһуламмыт холбоһуктаах көҕүлээһиннэри олоххо киллэриигэ чуолкай хардыылары оҥорорго бэлэмин бигэргэттэ.