Саха сиригэр генетическэй дерматология киинин арыйыахтара

Доруобуйа харыстабылын министиэристибэтигэр генетическэй дерматология киинин тэрийии боппуруоһун дьүүллэстилэр. Бу тэрилтэ нэһилиэстибэнэн тирии ыарыылаах оҕолорго мэдиссиинэ көмөтүн хаачыстыбатын тупсарыаҕа, кэмигэр диагнозтааһын,  кэтээн көрүү уонна саҥа мэдиссиинэ ньымаларын киллэриинэн дьарыктаныа.

«Ону тэҥэ ыарыылаахтары эмтэринэн уонна мэдиссиинэ тэрилинэн хааччыйыыны дьүүллэстибит, ол иһигэр сэдэх тирии ыарыыларын эмтиир препараттары. Эмтэр «Круг добра» оҕолору өйүүр пуонда нөҥүө бэриллэллэр. Бу пуонда олоххо кутталлаах ыарахан хроническай ыарыылардаах, ол иһигэр орфаннай ыарыылардаах оҕолорго мэдиссиинэ көмөтүн үбүлээһиҥҥэ көмөлөһөр. Мунньахха «Круг добра» пуонда генодерматозтарга исписэлииһэ, «БЭЛА» үтүөнү оҥорор пуонда научнай-чинчийэр бырайыактар отделын салайааччыта Виктория Поленова баара», — диэн  Доруобуйа харыстабылын министиэристибэтиттэн иһитиннэрдилэр.

2021 сылтан Доруобуйа харыстабылын министиэристибэтэ «Круг добра» пуондаҕа араас уустук ыарыылардаах 100 оҕоҕо эмтэри биэрэргэ сайаапкалары ыыппыта. Түөрт сыл устатыгар эмтэргэ анаммыт үп-харчы суумата 1 миллиард 714 мөлүйүөн солкуобай буолбута.