Саха сиригэр  «Геология: номоҕу сөргүтүү» бырайыак иккис түһүмэҕэ саҕаланна

2025-2027  сылларга «Геология: номоҕу сөргүтүү»   федеральнай бырайыагы олоххо киллэрии чэрчитинэн Саха сиригэр 26 эбийиэккэ үлэ былааҥҥа турар.

Сир баайын туһаҕа таһаарыы федеральнай ааҕыныстыбатын салайааччыта  Олег Казановы кытта көрсүһүүгэ бырайыак иккис түһүмэҕин олоххо киллэриини дьүүллэһиигэ өрөспүүбүлүкэҕэ уопсайа  18,4 млрд солк суумалаах геологическай чинчийии үлэтэ барыаҕа. Үлэ ыытыллар 26 эбийиэгэр үлэ маннык аттарыллыаҕа: 11 эбийиэк кытаанах минераллары хостооһуҥҥа, 10 – углеводороднай сырьеҕа, 5 эбийиэк эрэгийиэннээҕи геологическай чинчийэр үлэҕэ ананыаҕа. Итини тэҥэ, кэлэр 10 сылга олоххо киллэрэргэ Арассыыйа Бэрэсидьиэнин өйөбүлүнэн Айсен Николаев этиитигэр сөп түбэһиннэрэн, уопсайа 142 млрд солк. суумалаах 112 геологическай чинчийэр учаастак ​​испииһэгэ эрдэ оҥоһуллан сөбүлэһиллибитэ. Ил Дархан бэлиэтээбитинэн, сир баайын хостооһуҥҥа Саха сирэ улахан суолталаах оруолу ылар.