Саха сиригэр ГИМС сулууспата тэриллибитэ 41 сылын бэлиэтээтилэр

Киин куоракка Ыксаллаах-быһыы майгы министиэристибэтин ГИМС сулууспата тэриллибитэ 41 сылыгар анаммыт үөрүүлээх тэрээһин буолан ааста.

Саха сиринээҕи ЫБМ пресс-сулууспата иһитиннэрэринэн, инспекция сулууспатыгар бастыҥ үлэһиттэригэр судаарыстыбаннай наҕараадалар туттарылыннылар. Ону таһынан, сулууспа отделыгар «Альянс» уонна «ПК 500» патрульнай катердар күлүүстэрин биэрдилэр.

«ГИМС үлэтин саамай суолталаах уонна сыаналаах түмүгүнэн ууга быыһаммыт дьон олоҕо буолар. Бу сыллар тухары өрөспүүбүлүкэтээҕи ГИМС инспектордара нэһилиэнньэҕэ ууга куттала суох буолуутун хонтуруолуур үлэни көдьүүстээхтик толороллор», — диэн Саха сиринээҕи ЫБМ управлениетын начаалынньыга Павел Гарин бэлиэтээтэ.

Үөрүүлээх быһыыга-майгыга ГИМС сулууспатын бастыҥ үлэһиттэригэр грамоталар уонна судаарыстыбаннай наҕараадалар туттарылыннылар. Оттон олохторун сулууспаҕа анаабыт инспекция бэтэрээннэригэр ураты махтал тыллара этилиннилэр.

Ону таһынан, тэрээһиҥҥэ Нуучча православнай таҥаратын дьиэтин Дьокуускайдааҕы уонна Ленскэйдээҕи Епархиятын бэрэстэбиитэллэрэ, Тырааныспар эйгэтигэр кэтээн көрөр сулууспа, Өлүөнэ бассейнын дьаһалта үлэһиттэрэ, Тырааныспар уонна суол хаһаайыстыбатын министиэристибэтэ, ону тэҥэ Дьокуускай куорат дьаһалтатын бэрэстэбиитэллэрэ кытыннылар.