Саха сиригэр – “ГЛОБАЛ КАРС”

Бүгүн Дьокуускайга Бэчээт дьиэтин пресс-киинигэр «ГЛОБАЛ КАРС” XЭТ массыына саҥа холдинын биһирэмэ  буолла. Саҥа хампаанньаҕа автопром, логистика, маркетинг, сервис бастыҥ исписэлиистэрэ үлэлиэхтэрэ.

Генеральнай дириэктэр Андрей Котерев холдинг Саха сиригэр аһыллыбыт биричиинэлэригэр тохтоото. Онно массыына ырыынагын балаһыанньатын ырытта. Онон эрэгийиэҥҥэ туһалаах холдинг буолар кэскиллээҕин бэлиэтээтэ. Холдинг саҥа уонна сүүрбүт массыыналары биирдиилээн атыылааһыны тэрийэр былааннаах. Ол курдук, биирдиилээн дьон сакааһынан Казахстантан, Кытайтан, Соҕуруу Кэриэйэттэн, Японияттан уонна Арассыыйа атын эрэгиийэннэриттэн аҕалыахтарын сөп. Атыылаһааччыларга кирэдьиит, лизинг, страховкалааһын сөптөөх усулуобуйатын олохтуохтара.

СӨ тырааныспарка уонна суол хаһаайыстыбатыгар  миниистирин солбуйааччы Андрей Потапов массыына саҥа холдина Саха сиригэр кэлиитин үтүө түгэнинэн бэлиэтээн туран, өрөспүүбүлүкэҕэ спецтиэхиньикэ, оптуобустар наадаларын эттэ. Эһиилгиттэн киириэхтээх национальнай бырайыак үлэтигэр холдинг эмиэ туһалыан сөбүн аҕынна. Ону тэҥэ үлэ саҥа миэстэтин таһаарыыга көмөлөһүөҕэ. Кини этэринэн, Саха сиригэр билигин 300 тыһ. легковой массыына баар.

СӨ Урбааны уонна туризмы сайыннарыыга миниистирэ Тимур Ханды Саха сиригэр кэлбит бөдөҥ холдинг туризмы сайыннарыыга көмөлөһүөн сөбүн бэлиэтээтэ. Холобура, массыынанан айан туризмыгар.

Салгыы Тырааныспар департаменын салайааччытын солбуйааччы Сергей    Кривошапкин, Урутаан бэлэмнээһин кииниттэн И.Дохунаева кытыннылар. «Новаком» тутуу хампаанньатыттан Иван Мохначевскай тутууга спецтиэхиньикэҕэ ыарахаттары көрсөллөрүнэн, маннык хампаанньа кэлиитэ наадалааҕын бэлиэтээтэ.

Бу курдук, Саха сиригэр Global Cars бэйэтэ киэҥ бырагыраамалаах, сыаллаах-соруктаах күүстээх санаалаах кэллэ.